Кыргыз Республикасынын Экономика жана коммерция министрлигинин Өнүктүрүү жана материалдык камсыздоо фонду жөнүндө жобо (Кыргыз Республикасынын Министрлер Кабинетинин токтомуна)

Кыргыз Республикасынын Министрлер Кабинетинин 2024-жылдын 28-июнундагы № 339 токтомуна ылайык КҮЧҮН ЖОГОТТУ

Тиркеме

(Кыргыз Республикасынын Министрлер Кабинетинин 2021-жылдын 24-декабрындагы № 343 токтомуна)

Кыргыз Республикасынын Экономика жана коммерция министрлигинин Өнүктүрүү жана материалдык камсыздоо фонду жөнүндө жобо

1. Жалпы жоболор

1. Кыргыз Республикасынын Экономика жана коммерция министрлигинин Өнүктүрүү жана материалдык камсыздоо фонду (мындан ары - Фонд) материалдык-техникалык базаны бекемдөө, Кыргыз Республикасынын Экономика жана коммерция министрлигинин (мындан ары - Министрлик) кызматкерлеринин иши үчүн зарыл болгон шарттарды түзүү жана аларды социалдык жактан коргоону камсыз кылуу максатында түзүлөт.

2. Фонддун каражаттарын каржылоо булактары жана аларды түзүүнүн тартиби

2. Фонддун каражаттары Кыргыз Республикасынын Экономика жана коммерция министрлигинин эмгек акы төлөө фондунан элүү пайыз өлчөмүндөгү чегерүүлөрдөн жана Кыргыз Республикасынын бюджеттик мыйзамдарына каршы келбеген башка түшүүлөрдөн турган республикалык бюджеттин чыгаша бөлүгүнөн каржылоонун эсебинен түзүлөт.

Каражаттарды Фондго чегерүү үчүн Министрлик тарабынан белгиленген тартипте Кыргыз Республикасынын Финансы министрлигинин Борбордук казыналыгында бюджеттик каражаттар боюнча учурдагы эсеп ачылат. (КР Министрлер Кабинетинин 2022-жылдын 9-сентябрындагы № 489, 2024-жылдын 12-апрелиндеги № 170 токтомдорунун редакциясына ылайык)

3. Фонддун каражаттары тийиштүү жылга чыгымдардын сметасы бекитилген күндөн тартып бир айдын ичинде бөлүштүрүлөт.

3. Фонддун каражаттарын пайдалануунун тартиби

4. Фонддун каражаттары төмөнкүлөргө пайдаланылат:

1) стандарттарды, методикаларды, колдонмолорду, стратегиялык документтерди ж.б. түзүү боюнча илимий-изилдөө иштерине төлөөгө;

2) кызматтык милдеттерин аткарууда жаракат алган кызматкерлерге же каза болгон кызматкерлердин үй-бүлөлөрүнө бир жолку жөлөкпул төлөөгө;

3) кызматкерлерди стимулдаштырууга;

4) дарылануу жана башка максаттар үчүн бир жолку материалдык жардам көрсөтүүгө, иш берүүчүлөр менен Министрликтин кызматкерлеринин өкүлчүлүктүү органдарынын ортосунда түзүлүүчү жамааттык келишим боюнча башка милдеттенмелерди аткарууга;

5) Министрликтин материалдык-техникалык жана социалдык базасын өнүктүрүүгө жана чыңдоого, Министрликтин иши үчүн арналган кызматтык автотранспортту сатып алууга жана тейлөөгө, инфратүзүмдү сатып алууга, курууга жана күтүүгө, турак жай сатып алуу үчүн кайтарылма каражаттарды берүүгө, кызматтык жайлардын ижара акысын төлөөгө;

6) компьютердик жабдууларды, программалык камсыздоону, уюштуруу техникасын, байланыш каражаттарын, комплекттөөчүлөрдү, эмеректерди сатып алууга, оңдоого жана техникалык тейлөөгө;

7) өкүлчүлүк чыгымдарына, расмий жолугушууларды, семинарларды, конференцияларды уюштурууга жана өткөрүүгө, социалдык-маданий жана спорттук иш-чараларды өткөрүүгө, сувенирлерди, эстелик жана баалуу белектерди сатып алууга;

8) Министрликтин ишине тиешелүү маселелер боюнча буклеттерди, брошюраларды жана башка адистештирилген адабияттарды, анын ичинде электрондук маалымат алып жүрүүчүлөрдө иштеп чыгууга, чыгарууга, сатып алууга;

9) Министрликтин кызматкерлерин, анын ичинде чет өлкөлөрдө окутууну жана квалификациясын жогорулатууну уюштурууга;

10) Министрликтин өзүнүн функцияларын аткаруу максатында юридикалык жактарга жана жеке адамдарга товарлар, жумуштар жана кызмат көрсөтүүлөр үчүн төлөөгө;

11) Кыргыз Республикасынын эмгек мыйзамдарында белгиленген тартипте иш жүзүндөгү чыгымдардын ордун толтуруу бөлүгүндө иш сапар чыгымдарын төлөөгө.

(КР Министрлер Кабинетинин 2024-жылдын 12-апрелиндеги № 170 токтомунун редакциясына ылайык)

5. Министрликтин кызматкерлерине Фонддон стимулдаштыруу жана кайтарылма каражаттарды берүү Министрлик тарабынан бекитилген мындай төлөмдөр жөнүндө жоболорго ылайык жүргүзүлөт.

(КР Министрлер Кабинетинин 2024-жылдын 12-апрелиндеги № 170 токтомунун редакциясына ылайык)

6. Фонддун каражаттарынын багытынын жана пайдалануунун конкреттүү өлчөмдөрү Кыргыз Республикасынын экономика жана коммерция министри тарабынан белгиленет.

4. Эсепке алуунун тартиби жана отчёттуулук

7. Фонддун каражаттарын сарптоо чыгымдардын бекитилген сметаларына жана кирешелердин иш жүзүндө келип түшүүсүнө ылайык жүргүзүлөт.

8. Кырсыз Республикасынын экономика жана коммерция министри Фонддун каражаттарын тескөөчү жана пайдалануу үчүн жооптуу болуп саналат.

9. Министрликтин бухгалтердик эсебинин тийиштүү түзүмдүк бөлүмдөрү Фонддун каражаттарынын түзүлүшүн (келип түшүүсүн), бөлүштүрүлүшүн эсепке алууну, каражаттардын белгиленген тартипте бекитилген сметалык багыттоолорго ылайык максаттуу пайдаланылышын контролдоону жана Кыргыз Республикасынын мыйзамдарына ылайык Фонддун тескөөчүсүнө аталган каражаттар боюнча отчётторду берүүнү ишке ашырат.