Кыргыз Республикасынын Финансы министрлигине караштуу Финансы-кредиттик фонд жөнүндө жобо (Кыргыз Республикасынын Министрлер Кабинетинин токтому менен бекитилди) 5-тиркеме

5-тиркеме

(Кыргыз Республикасынын Министрлер Кабинетинин 2021-жылдын 10-декабрындагы № 302 токтому менен бекитилди)

Кыргыз Республикасынын Финансы министрлигине караштуу Финансы-кредиттик фонд жөнүндө жобо (Кыргыз Республикасынын Министрлер Кабинетинин 2022-жылдын 20-июнундагы № 326, 2024-жылдын 6-майындагы № 217, 2024-жылдын 11-сентябрындагы № 554 токтомдорунун редакцияларына ылайык)

1. Жалпы жоболор

1. Бул Жобо Кыргыз Республикасынын Финансы министрлигине караштуу Финансы-кредиттик фонддун (мындан ары ‒ Фонд) ишинин укуктук жана уюштуруу негиздерин аныктайт.

2. Фонд Кыргыз Республикасынын Экономика жана финансы министрлигине караштуу Бюджеттик кредиттерди башкаруу боюнча мамлекеттик агенттиктин укук улантуучусу болуп саналат.

3. Фонд Кыргыз Республикасынын Финансы министрлигинин (мындан ары ‒ Министрлик) ведомстволук бөлүмүнүн статусунда иштеген, бюджеттик кредиттөө жаатында мамлекеттик саясатты ишке ашырууга өзгөчө укукка ээ болгон, финансылык жана финансылык эмес активдерди башкаруу боюнча операцияларды Министрликтин атынан жүргүзгөн, Кыргыз Республикасынын аткаруу бийлигинин мамлекеттик органы болуп саналат.

4. Фонд өзүнүн ишинде Кыргыз Республикасынын Конституциясын жана мыйзамдарын, Кыргыз Республикасынын башка ченемдик укуктук актыларын, эл аралык укуктун жалпы таанылган принциптерин жана ченемдерин, Кыргыз Республикасынын мыйзамдарына ылайык күчүнө кирген эл аралык келишимдерди, ошондой эле ушул Жобону жетекчиликке алат.

5. Фонд өзүнүн ишин мамлекеттик органдар, жергиликтүү өз алдынча башкаруу органдары, бизнес коомчулугу, коомдук бирикмелер, илимий жана башка уюмдар менен өз ара аракеттенип ишке ашырат.

6. Фонд юридикалык жак болуп саналат, өз алдынча балансы, өзүнчө мүлкү, казыналык системада өздүк эсептери, ошондой эле бюджеттик мыйзамдарда белгиленген тартипте коммерциялык банктардагы эсептери, Кыргыз Республикасынын Мамлекеттик гербинин сүрөтү түшүрүлгөн кыргыз, орус жана англис тилдеринде өзүнүн аталышы жазылган мөөрү, белгиленген үлгүдөгү башка мөөрлөрү, штамптары, бланктары бар.

Уюштуруу-укуктук формасы ‒ ыкчам башкаруу укугунда түзүлгөн мамлекеттик мекеме.

7. Фонддун толук фирмалык аталышы:

1) мамлекеттик тилде: “Кыргыз Республикасынын Финансы министрлигине караштуу Финансы-кредиттик фонд”;

2) расмий тилде: “Финансово-кредитный фонд при Министерстве финансов Кыргызской Республики”.

8. Фонддун кыскартылган аталышы:

1) мамлекеттик тилде: “Финансы-кредиттик фонд”;

2) расмий тилде: “Финансово-кредитный фонд”.

9. Фонддун юридикалык дареги: 720040, Кыргыз Республикасы, Бишкек шаары, Эркиндик бульвары, 58а.

2. Фонддун ишинин максаты

10. Фонддун ишинин максаты болуп бюджеттик кредиттерди, ошондой эле финансылык жана финансылык эмес активдерди натыйжалуу башкаруу жолу менен республиканын экономикасынын тармактарын өнүктүрүү жана аларга колдоо көрсөтүү саналат.

3. Фонддун милдеттери

11. Фонддун милдеттери болуп төмөндөгүлөр саналат:

1) Кыргыз Республикасынын Министрлер Кабинетинин чечимдерине ылайык берилген бюджеттик кредиттерди башкаруу;

2) финансылык жана финансылык эмес активдерди башкаруу боюнча операцияларды ишке ашыруу;

3) мамлекеттик программаларды жана долбоорлорду ишке ашыруунун алкагында экономика тармактарын финансылык колдоо;

4) зайымчылар менен Министрликтин ортосунда түзүлгөн кредиттик келишимдерден келип чыгуучу Кыргыз Республикасынын Министрлер Кабинетинин укуктарын жана кызыкчылыктарын ишке ашырууну камсыз кылуу;

5) уюштуруучусу жана акционери Министрлик болгон мамлекеттик ишканалардын, мекемелердин жана коомдордун ишинин натыйжалуулугун жогорулатуу боюнча чараларды көрүү жана ишке ашыруу.

4. Фонддун функциялары

12. Фонд жүктөлгөн маселелерди чечүү үчүн төмөнкү функцияларды ишке ашырат:

1) тармактык саясатты ишке ашыруу функциялары:

- бюджеттик кредиттөө жаатындагы мамлекеттик саясаттын негизги багыттарын жана артыкчылыктарын ишке ашыруу, финансылык жана финансылык эмес активдерди, анын ичинде утурлама фонддордун каражаттарын башкаруу;

- бюджеттик кредиттөөнүн жол-жоболорун өркүндөтүү жана өнүктүрүү, финансылык жана финансылык эмес активдерди башкаруу;

- кредит берүүгө байланыштуу мамлекеттик программаларды жана Кыргыз Республикасынын Министрлер Кабинетинин тиешелүү чечимдерин ишке ашыруунун алкагында юридикалык жактарды субсидиялоо;

- финансылык ижара (лизинг) боюнча операцияларды ишке ашыруу;

- табигый кырсыктардан жапа чеккен Кыргыз Республикасынын калкына акысыз жардам көрсөтүү жана узак мөөнөттүү жеңилдетилген ссудаларды берүү, ошондой эле берилген узак мөөнөттүү жеңилдетилген ссудалардын кайтарылып берилишин камсыз кылуу;

- бюджеттик кредиттерди берүүнүн, пайдалануунун, тейлөөнүн жана төлөөнүн шарттарын көрсөтүү менен республикалык бюджеттен бюджеттик кредиттерди берүү жөнүндө Кыргыз Республикасынын Министрлер Кабинетинин чечимдеринин долбоорлорун даярдоо жана Министрликке киргизүү;

- бюджеттик кредиттерди берүү жөнүндө өтүнмөлөрдү кароо жана алардын бюджеттик кредит берүүнүн принциптерине, критерийлерине жана шарттарына ылайык келүүсүнө карата корутундуларды берүү;

- Министрликтин атынан кредиттик жана лизингдик келишимдерди, субсидиялоо жөнүндө келишимдерди жана Фонддун функцияларын жана милдеттерин ишке ашыруунун алкагында башка келишимдерди, макулдашууларды түзүү;

- зайымчы менен Министрликтин же Фонддун ортосунда түзүлгөн келишимдердин шарттарына ылайык бюджеттик кредиттерди өз убагында кайтарууну камсыз кылуу боюнча чараларды иштеп чыгуу жана ишке ашыруу;

- кредиттик жана күрөө келишимдеринде жана макулдашууларда каралган күрөө предметин соттон тышкаркы тартипте өндүрүп алуу жана бюджеттик кредиттер жана лизингдик төлөмдөр боюнча карыздарды мөөнөтүнөн мурда өндүрүү жол-жоболорун, финансылык санкцияларды колдонуу;

- бюджеттик кредиттер жана лизинг боюнча карыздарды реструктуризациялоо боюнча сунуштарды киргизүү жана операцияларды жүргүзүү;

- бюджеттик кредиттер жана лизинг боюнча карызды которуу жол-жобосун ишке ашыруу;

- карызды тышкы башкаруу жана конвертациялоо жол-жоболорун ишке ашырууну камсыз кылуу;

- бюджеттик кредиттер жана лизинг боюнча кредитордун бузулган укуктарын соттук коргоо боюнча чараларды камсыз кылуу;

- зайымчылар, лизинг алуучулар же үчүнчү жактар тарабынан бюджеттик кредиттер жана лизинг боюнча соттук актылардын өз ыктыяры менен аткарылышына багытталган чараларды ишке ашыруу;

- карызды мажбурлап өндүрүү жол-жоболорун ишке ашырууну демилгелөө, ага катышуу жана мониторинг жүргүзүү, ошондой эле Кыргыз Республикасынын мыйзамдарында каралган тартипте зайымчыларды жоюу жана банкроттук (кудуретсиздик) процесстерине катышуу;

- региондорду өнүктүрүү фонддорунун каражаттарынын эсебинен берилүүчү бюджеттик кредиттерди администрациялоо;

2) жөнгө салуу функциялары:

- республикалык бюджеттен бюджеттик кредитти алуучу, лизинг берилүүчү жана/же субсидиялануучу субъекттерди тандоо;

- карызкорлордун республиканын чегинен тышкары чыгуу укуктарын чектөө боюнча Кыргыз Республикасынын мыйзамдарында каралган тартипте чараларды көрүү;

- бюджеттик кредиттерди, субсидияларды, финансылык жана финансылык эмес активдерди, лизинг предметтерин, ошондой эле бюджеттик кредиттер боюнча зайымчылардын жана лизинг боюнча лизинг алуучулардын карызын жоюунун эсебинен өндүрүлгөн мүлктү эсепке алуу;

3) координациялоо, контролдоо жана мониторинг жүргүзүү функциялары:

- бюджеттик кредиттердин жана лизинг предметтеринин максаттуу жана натыйжалуу пайдалануусуна мониторинг жүргүзүү, аларды максатсыз пайдалануу тобокелдиктерин азайтуу боюнча чараларды иштеп чыгуу жана ишке ашыруу;

- зайымчылардын экономикалык жана финансылык ишине жана алардын бюджеттик кредиттер жана лизинг боюнча карыздарына мониторинг жүргүзүү;

- күрөөгө алынган мүлктүн абалын текшерүү, күрөөнү жоготуу, бузуу тобокелдиктерин же рыноктук конъюнктуранын өзгөрүүсү, суроо-талаптын жана баалардын төмөндөшү менен байланышкан башка тобокелдиктерди азайтуу боюнча чараларды иштеп чыгуу жана ишке ашыруу;

- бюджеттик кредит боюнча зайымчынын милдеттенмелерин аткарууну камсыз кылуу үчүн күрөөнүн курамын белгилөө, өзгөртүү, жаңылоо боюнча операцияларды жүргүзүү;

- зайымчыларга кредиттик, лизингдик жана күрөө келишимдери боюнча өздөрүнө алган милдеттенмелерди аткаруу тууралуу кабарламаларды, билдирүүлөрдү, доо-талаптарды жиберүү;

4) колдоо функциялары:

- бюджеттик кредиттерди жана лизинг берүү жолу менен каржылануучу социалдык-экономикалык өнүктүрүүнүн мамлекеттик программаларын иштеп чыгууга жана ишке ашырууга катышуу;

- бюджеттик кредит жана лизинг алууга талаптанган юридикалык жактардын финансылык ишине талдоо жүргүзүү;

- Фонддун иш чөйрөсүнө кирген маселелер боюнча Кыргыз Республикасынын укук коргоо жана сот органдарында Министрликтин кызыкчылыктарын көрсөтүү;

- Фонддун максаттарына жетүү үчүн Министрликтин ишинин чөйрөсүнө кирген багыттар боюнча тиешелүү иштерди Министрликтин тапшырмасы боюнча жүргүзүү;

- Фонддун иш чөйрөсүнө кирген багыттар боюнча сунуштарды иштеп чыгуу үчүн Министрликтин тапшырмасы боюнча мамлекеттик программаларды, концепцияларды жана башка долбоорлорду иштеп чыгуу боюнча иштерди аткаруу бийлигинин мамлекеттик органдарынын, Кыргыз Республикасынын Улуттук илимдер академиясынын, илим изилдөө жана башка мекемелердин өкүлдөрүн, көз карандысыз эксперттерди (макулдашуу боюнча) тартуу менен жүргүзүү;

- Кыргыз Республикасынын Министрлер Кабинети тарабынан аныкталган тартипте финансы-кредиттик, эл аралык жана чет өлкөлүк уюмдарга Министрликтин атынан кепилдик берүү;

5) кызматтарды көрсөтүү функциялары:

- зайымчылардын экономикалык жана финансылык ишине мониторинг жүргүзүүнүн жыйынтыктары боюнча аларга консультация берүү;

- бюджеттик кредиттерди жана Министрлик кредитор болуп саналган башка булактардын эсебинен берилген кредиттерди тейлөө боюнча чараларды Кыргыз Республикасынын мыйзамдарында белгиленген тартипте камсыз кылуу;

- бюджеттик кредиттер, лизинг жана Министрлик кредитор болуп саналган каржылоонун башка булактарынын эсебинен берилген кредиттер боюнча зайымчылардын карыздарынын абалы жөнүндө маалыматты чогултуу, иштеп чыгуу жана сактоо.

5. Фонддун ыйгарым укуктары

13. Фонд функцияларын жана милдеттерин ишке ашыруу үчүн төмөнкүлөргө укуктуу:

1) өз компетенциясынын чегинде бюджеттик кредиттер жана лизинг боюнча милдеттенмелерди жоюу боюнча чараларды көрүүгө;

2) Фондго коюлган милдеттерди аткаруу үчүн зарыл болгон маалыматтарды жана материалдарды мамлекеттик органдардан, жергиликтүү өз алдынча башкаруу органдарынан, ошондой эле жеке жана юридикалык жактардан белгиленген тартипте суроого жана алууга;

3) бюджеттик кредиттер жана лизинг боюнча милдеттенмелерди аткарууну камсыз кылуу үчүн зайымчылар менен келишимдерди түзүүгө;

4) долбоорлорду иштеп чыгууга жана белгиленген тартипте Министрлик жана тышкы иштер чөйрөсүндөгү ыйгарым укуктуу мамлекеттик орган менен макулдашуу боюнча чет мамлекеттер жана эл аралык уюмдар менен эл аралык келишимдерге жана макулдашууларга, башка документтерге кол коюуга катышууга;

5) мамлекеттик сатып алуулар чөйрөсүндөгү Кыргыз Республикасынын мыйзамдарына ылайык күрөөнүн жана башка мүлктүн баалоо наркын аныктоо үчүн көз карандысыз эксперт-баалоочуларды тартууга;

6) мамлекеттик сатып алуулар чөйрөсүндөгү Кыргыз Республикасынын мыйзамдарына ылайык өз ишин жүзөгө ашыруу процессине акы төлөнүүчү негизде эксперттерди жана консультанттарды, анын ичинде чет өлкөлүктөрдү тартууга;

7) зайымчылардан, үчүнчү жактардан, сот аткаруучуларынан жана администраторлордон банкроттук процессте күрөөгө коюлган жана башка мүлктү бюджеттик кредиттер жана башка зайымдык каражаттар боюнча карызды жоюунун эсебинен кийин ээликтен ажыратуу же Фонддун ишине пайдалануу укугу менен кабыл алууга;

8) бюджеттик кредиттер боюнча карызды жабуунун эсебинен кабыл алынган (өндүрүп алынган) мүлктү, талап кылынган лизинг предметин сатуу боюнча тооруктарды белгиленген тартипте өткөрүүгө, ошондой эле риэлтордук компаниялардын кызматын тартууга;

9) банкроттук (кудуретсиздик) чөйрөсүндөгү мыйзамдарда каралган тартипте зайымчыны банкрот деп таануу жөнүндө арыз менен сотко кайрылууга;

10) жарашуу макулдашуусун түзүүгө жана шарттарын аныктоого, анын ичинде банкроттук процессинде;

11) сот актыларын өз ыктыяры менен аткаруу жөнүндө макулдашууларды түзүүнүн тартибин жана шарттарын аныктоого;

12) Фонддун иш чөйрөсүнө кирген маселелер боюнча адистерди кайра даярдоо жана квалификациясын жогорулатуу үчүн курстарга жиберүүгө;

13) Фондго жүктөлгөн милдеттерди ишке ашыруу үчүн маалыматтык системаларды жана маалымат базаларын иштеп чыгууга, ишке киргизүүгө;

14) Фонддун компетенциясына кирген маселелер боюнча кеңешмелерди жана семинарларды уюштурууга жана өткөрүүгө;

15) Фонддун компетенциясына кирген маселелер боюнча министрликтердин, административдик ведомстволордун жана аткаруу бийлигинин башка органдарынын чакыруусу боюнча коллегиялардын ишине катышууга;

16) белгиленген тартипте келишимдерди түзүүгө, кыймылдуу жана кыймылсыз мүлктү сатып алууга жана ижарага алууга, юридикалык жана жеке жактар менен башка жарандык-укуктук мамилелерде болууга;

17) жеке мүнөздөгү маалымат чөйрөсүндөгү Кыргыз Республикасынын мыйзамдарына ылайык бюджеттик кредиттерди, лизингди жана субсидияларды алуу үчүн кайрылган арыз ээлеринин, ошондой эле зайымчылардын жеке маалыматтарын чогултууга, иштеп чыгууга жана сактоого;

18) уставдык капиталда мамлекеттик үлүшү менен катышкан чарбакер коомдордо юридикалык жактарды уюштуруучунун жана акционердин укугун Министрликтин атынан ишке ашырууга;

19) Кыргыз Республикасынын мыйзамдарында каралган башка укуктарга.

6. Фонддун ишин уюштуруу

14. Фондду Кыргыз Республикасынын финансы министринин (мындан ары ‒ министр) сунушу боюнча Кыргыз Республикасынын Министрлер Кабинетинин Төрагасы тарабынан кызматка дайындалуучу жана кызматтан бошотулуучу төрага жетектейт.

Фонддун төрагасы түздөн-түз министрге баш ийет.

15. Төраганын орун басарлары министрдин сунушу боюнча Кыргыз Республикасынын Министрлер Кабинетинин Төрагасы тарабынан кызматка дайындалат жана кызматтан бошотулат.

Төраганын орун басарлары түздөн-түз төрагага баш ийишет жана өз иштерин аларга жүктөлгөн милдеттердин чегинде жүзөгө ашырышат.

16. Фонддун төрагасы:

1) Фонддун ишин уюштурат жана Фондго жүктөлгөн милдеттерди аткаруу үчүн жоопкерчилик тартат;

2) Фонддун ишинин жыйынтыктары жөнүндө отчётту жана келерки жылга иш планды Министрликтин кароосуна берет;

3) белгиленген эмгек акы фондунун жана чектүү штаттык санынын чектеринде Фонддун түзүмүнүн жана штаттык ырааттамасынын долбоорлорун министрге бекитүүгө киргизет;

4) Фонддун коллегиясы карап чыккандан жана жактыргандан кийин министрге ушул Жобого өзгөртүүлөрдү жана толуктоолорду киргизүү, Фонддун түзүмүн жана штаттык ырааттамасын өзгөртүү, Фонддун аймактык органдарын түзүү, кайра уюштуруу жана жоюу жөнүндө сунуштарды берет;

5) Фонддун кызматкерлерин белгиленген тартипте кызматка дайындайт жана кызматтан бошотот, аларга сыйлоо жана тартиптик чараларды колдонот;

6) Кыргыз Республикасынын мамлекеттик органдары, ишканалары, мекемелери жана уюмдары, эл аралык уюмдар, чет мамлекеттердин юридикалык жана жеке жактары менен мамилелерде Фонддун укуктарын жана мыйзамдуу кызыкчылыктарын көздөйт;

7) Фонддун атынан ишеним катсыз бүтүмдөрдү түзөт;

8) Фонддун коллегиясы жөнүндө жобону, Фонддун борбордук аппаратынын түзүмдүк бөлүмдөрү жана аймактык органдары жөнүндө жоболорду бекитет;

9) Фонддун кызматкерлеринин кызматтык милдеттерин бекитет;

10) Фонддун локалдуу укуктук актыларын кабыл алат;

11) өзүнүн ыйгарым укуктарынын чегинде Фонддун мүлкүн башкарат жана каражаттарын тескейт;

12) Фонддун жана анын аймактык органдарынын кызматкерлери тарабынан аткаруу үчүн милдеттүү болгон буйруктарды чыгарат;

13) Фонддун аймактык органдарынын жетекчилеринин өз ыйгарым укуктарынын чегинен чыккан же Кыргыз Республикасынын мыйзамдарын, ушул Жобону жана Фонддун аймактык органы жөнүндө жобону бузуу менен чыгарылган актыларын жокко чыгарат;

14) Кыргыз Республикасынын мыйзамдарында каралган башка ыйгарым укуктарды ишке ашырат.

17. Фонддо 7 адамдан турган коллегия түзүлөт, анын курамына Фонддун төрагасы, Фонддун төрагасынын орун басарлары, Министрликтин өкүлү, ошондой эле Фонддун борбордук аппаратынын түзүмдүк бөлүмдөрүнүн жетекчилери кирет. Коллегиянын төрагасы болуп кызмат орду боюнча Фонддун төрагасы, ал жокто ‒ ал ыйгарым укук берген төраганын орун басары саналат.

Коллегия мүчөлөрүнүн жеке курамын министр бекитет. Фонддун коллегиясы жөнүндө жобону Фонддун төрагасы бекитет.

18. Фонддун мүлкүн Фонддун балансында чагылдырылган негизги жана жүгүртүлүүчү фонддор түзөт.

19. Фонддун түзүмү борбордук аппараттан жана аймактык органдардан турат.

Фонддун түзүмү жана штаттык ырааттамасы бекитилген штаттык сандын жана эмгек акы фондунун чегинде министр тарабынан бекитилет, ал Фонддун милдеттеринин жана функцияларынын өзгөрүшүнө байланыштуу гана өзгөртүлүшү мүмкүн. Мында жаңы төраганы дайындоо Фонддун түзүмүн өзгөртүү үчүн негиз болуп саналбайт.

20. Фондду күтүүгө чыгымдарды каржылоо республикалык бюджеттин жана Кыргыз Республикасынын мыйзамдарында тыюу салынбаган башка каржылоо булактарынын эсебинен ишке ашырылат.

21. Фонд өз ишинде Министрликке отчёт берет.

22. Фонд статистикалык отчёттуулукту жүргүзөт жана өз ишинин жыйынтыктарын бухгалтердик эсепке алууну Кыргыз Республикасынын бухгалтердик эсепке алуу жана финансылык отчёттуулук чөйрөсүндөгү мыйзамдарынын талаптарына ылайык ишке ашырат.

23. Фонддун жылдык отчёту жана иш планы министр тарабынан бекитилет.

24. Фонд өз ишин ачык-айкындуулук жана отчёттуулук принциптеринде жүргүзөт. Бул принциптерди ишке ашыруу үчүн Фонд өзүнүн расмий сайтында төмөнкү маалыматтарды жайгаштырат:

1) Фонддун ишин жөнгө салуучу ченемдик-укуктук актыларды;

2) Фонддун отчётторун;

3) Фонддун иши жөнүндө башка маалыматтарды.

6. Корутунду жоболор

25. Фондду кайра түзүү же жоюу Кыргыз Республикасынын жарандык мыйзамдарына ылайык жүргүзүлөт.

26. Фонддун иши токтотулган учурда Фонддун документтери “Кыргыз Республикасынын Улуттук архив фонду жөнүндө” Кыргыз Республикасынын Мыйзамына ылайык сакталат жана пайдаланылат.