Кыргыз Республикасынын Айыл чарба министрлигине караштуу Суу ресурстары кызматы жөнүндө жобо (Кыргыз Республикасынын Министрлер Кабинетинин токтому менен бекитилген)

Кыргыз Республикасынын Министрлер Кабинетинин 2024-жылдын 7-мартындагы № 98 токтомуна ылайык КҮЧҮН ЖОГОТТУ

1-тиркеме

(Кыргыз Республикасынын Министрлер Кабинетинин 2021-жылдын 6-августундагы № 116 токтомуна)

Кыргыз Республикасынын Айыл чарба министрлигине караштуу Суу ресурстары кызматы жөнүндө ЖОБО (КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

1. Кыргыз Республикасынын Айыл чарба министрлигине караштуу Суу ресурстары кызматы (мындан ары - Кызмат) Кыргыз Республикасынын Айыл чарба министрлигинин суу ресурстарын башкаруу жана пайдалануу чөйрөсүндөгү мамилелерди мамлекеттик жөнгө салуучу мамлекеттик мекемеси жана ведомстволук бөлүмү болуп саналат.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

2. Кызмат Кыргыз Республикасынын Айыл, суу чарба жана аймактарды өнүктүрүү министрлигине караштуу Суу ресурстары мамлекеттик агенттигинин укук улантуучусу болуп саналат.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

3. Кызмат өзүнүн ишинде Кыргыз Республикасынын Конституциясын, Кыргыз Республикасынын мыйзамдарын, Кыргыз Республикасынын Президентинин жарлыктарын, Кыргыз Республикасынын Министрлер Кабинетинин токтомдорун жана тескемелерин, Кыргыз Республикасы катышкан, мыйзамда белгиленген тартипте күчүнө кирген эл аралык келишимдерди, Кыргыз Республикасынын Айыл чарба министрлигинин тескемелерин жана буйруктарын, ошондой эле ушул Жобону жетекчиликке алат.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

4. Кызмат өзүнүн ишин түздөн-түз жана ведомстволук органдары аркылуу аткаруу бийлигинин башка органдары, мамлекеттик бийликтин аймактык органдары, жергиликтүү өз алдынча башкаруу органдары, суу мамилелеринин субъекттерине кирген юридикалык жана жеке жактар, эл аралык жана өкмөттүк эмес уюмдар менен өз ара аракеттенүүдө жүргүзөт.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

5. Кызмат юридикалык жак болуп саналат, Кыргыз Республикасынын Мамлекеттик гербинин сүрөтү түшүрүлгөн жана мамлекеттик жана расмий тилдерде өзүнүн аталышы жазылган мөөрү, өз алдынча балансы, Кыргыз Республикасынын Финансы министрлигинин Борбордук казыналык системасында алыш-бериш жана башка эсептери, ошондой эле мамлекеттик жана расмий тилдерде штамптары, белгиленген үлгүдөгү бланктары жана башка атрибутикасы бар.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

6. Кызмат өзүнө бекитилип берилген, негизги фонддордон, жүгүртүлүүчү каражаттардан жана башка материалдык баалуулуктардан турган мүлктү оперативдүү башкарат.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

7. Кызмат ага суу ресурстарын башкаруу, жөнгө салуу жана сарамжалдуу пайдалануу максатында, ошондой эле мамлекеттин менчигинде турган ирригациялык жана башка суу чарба системаларын жана курулмаларын күтүүгө, эксплутациялоого жана өнүктүрүүгө бөлүнгөн жана ал тарабынан топтолгон бюджеттик жана башка каражаттардын тескөөчүсү болуп эсептелет.

Кызматтын каржылоо булагы болуп Кыргыз Республикасынын республикалык бюджетинен түшүүчү каражаттар жана атайын эсептерде топтолгон жана Кыргыз Республикасынын мыйзамдары менен тыюу салынбаган башка булактардан түшкөн каражаттар саналат. (КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

8. Кызматтын расмий аталышы:

1) толук аталышы:

- мамлекеттик тилде: "Кыргыз Республикасынын Айыл чарба министрлигине караштуу Суу ресурстары кызматы" мамлекеттик мекемеси";

- расмий тилде: "Государственное учреждение "Служба водных ресурсов при Министерстве сельского хозяйства Кыргызской Республики";

2) кыскартылган аталышы:

мамлекеттик тилде: "СРК"; расмий тилде: "СВР". (КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

9. Кызматтын юридикалык дареги: Кыргыз Республикасы, Бишкек шаары, Токтоналиев көчөсү, 4 А.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

10. Кызматтын негизги максаттары болуп төмөнкүлөр саналат:

- суу ресурстарын интеграциялык башкаруу механизмин киргизүү;

- суу ресурстарын жана суу чарба инфраструктурасынын объекттерин туруктуу башкарууну жана сарамжалдуу пайдаланууну камсыздоо;

- суу ресурстарын башкаруу жана пайдалануу чөйрөсүндө натыйжалуу мамлекеттер аралык кызматташууну камсыздоо жана башка мамлекеттер аралык суу мамилелерин жөнгө салуу.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

11. Кызматтын негизги милдеттери болуп төмөнкүлөр саналат:

- суу ресурстарын башкаруу жана пайдалануу чөйрөсүндөгү мамилелерди жөнгө салуу;

- ирригациялык инфраструктуранын объекттерин өнүктүрүү программаларын иштеп чыгуу жана ишке ашыруу;

- Кыргыз Республикасынын Айыл чарба министрлиги менен макулдашуу боюнча Кыргыз Республикасынын суу ресурстары чөйрөсүндөгү эл аралык кызматташуусун өнүктүрүү.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

12. Кызмат өзүнө жүктөлгөн милдеттерге ылайык төмөнкүдөй функцияларды ишке ашырат:

1) мамлекеттик суу саясатын иштеп чыгуу боюнча функциялар:

- суу ресурстарын пайдалануу жана жөнгө салуу чөйрөсүндөгү жана суунун агымы түзүлүүчү зоналарды аныктоо боюнча мамлекеттик саясатты ишке ашырууга багытталган ченемдик укуктук актылардын долбоорлорун иштеп чыгат жана Кыргыз Республикасынын Айыл чарба министрлигине киргизет:

- бассейн пландарын иштеп чыгууну уюштурат жана алардын аткарылышына мониторинг жүргүзүүнү камсыз кылат;

- башка мамлекеттик органдар, жергиликтүү өз алдынча башкаруу органдары менен бирдикте климаттын өзгөрүүсүнүн терс таасирине улуттук суу секторунун туруктуулугун камсыздоо, суу ресурстарын түгөнүүдөн жана булгануудан коргоо, суу ресурстарынын жарандык жана өнөр жай объекттерине, суу фондунун жана айыл чарба багытындагы жерлерге жана табигый экосистемаларга тийгизүүчү зыяндуу таасирин алдын алуу жана анын кесепеттерин жоюу менен байланышкан адаптациялык чараларды иштеп чыгат жана жүзөгө ашырат;

2) мамлекеттик суу саясатын ишке ашыруу боюнча функциялар:

- Суу боюнча улуттук кеңештин катчылыгынын функцияларын аткарат;

- Кыргыз Республикасынын Айыл чарба министрлиги менен макулдашуу боюнча чет мамлекеттер жана эл аралык уюмдар менен Кыргыз Республикасынын эл аралык келишимдерин жана башка документтерди белгиленген тартипте даярдоого, кол коюуга жана жүзөгө ашырууга катышат;

- Кыргыз Республикасынын Айыл чарба министрлиги менен макулдашуу боюнча Кыргыз Республикасы катышкан эл аралык келишимдерге ылайык, Кыргыз Республикасынын аймагында топтолгон суу ресурстарын мамлекеттер аралык бөлүштүрүүгө белгиленген тартипте катышат;

3) суу ресурстарын интеграциялык башкаруу боюнча ишти жөнгө салуу функциялары:

- жер үстүндөгү сууларды пайдаланууну жөнгө салуу боюнча иш-чараларды камсыздайт;

- суу ресурстарын пайдалануу менен байланышкан ишканаларды жана объекттерди долбоорлоодо, жаңысын курууда жана иштеп жатканын реконструкциялоодо суу ресурстары болушу жөнүндө корутундуларды берет жана макулдашат;

- суу мыйзамдарында каралган учурларда юридикалык жана жеке жактардын суу пайдалануу укугун чектейт же белгилүү бир мөөнөткө токтотуп турат;

- суу объекттерин, суу чарба системаларын жана курулмаларын эксплуатациялоо режимдерин жөнгө салат;

- бассейн пландарын методикалык жактан жетектейт жана аларды иштеп чыгууну координациялайт, алардын аткарылышына мониторинг жүргүзүүнү камсыз кылат;

- Суу боюнча бирдиктүү маалыматтык системаны иштеп чыгууну, түзүүнү жана туруктуу иштетүүнү камсыз кылат;

4) суу ресурстарына мониторинг жүргүзүү функциялары:

- башка мамлекеттик органдар, жергиликтүү өз алдынча башкаруу органдары жана суу пайдалануу субъекттери менен өз ара аракеттенүүдө суу ресурстарынын абалына жана аларды пайдаланууга мониторинг жүргүзөт;

- башка мамлекеттик органдар менен бирдикте Мамлекеттик суу кадастрын иштеп чыгууну жана маалыматтарын мезгил-мезгили менен жаңыртып турууну уюштурат;

- Мамлекеттик мелиоративдик кадастрды жүргүзөт;

- ыкчам гидрологиялык жана гидрогеологиялык маалыматтарды, өзгөчө кырдаалдар жөнүндө маалыматтарды жана суу ресурстарынын абалынын өзгөрүшү жана аны пайдалануу менен байланышкан башка актуалдуу маалыматты өз ара алмашуу маселелери боюнча башка мамлекеттик органдар менен өз ара аракеттенет;

- башка мамлекеттик органдар, жергиликтүү өз алдынча башкаруу органдары жана көз карандысыз суу пайдалануу субъекттери менен өз ара аракеттенүүдө жер үстүндөгү суу объекттеринен суу алуунун көлөмдөрүн, сууну берүү көлөмдөрүн эсепке алат;

- суу ресурстарын пайдалануунун узак мөөнөттүү жана оперативдүү болжолдорун иштеп чыгууну камсыз кылат;

5) суу ресурстарын пайдалануу чөйрөсүндөгү функциялар:

- Кыргыз Республикасынын Айыл чарба министрлигине караштуу Жерди жана сууну көзөмөлдөө боюнча кызмат менен бирге төмөнкүлөрдүн сакталышын белгиленген тартипте контролдойт:

суу пайдалануу укугуна уруксаттарда берилген шарттардын; юридикалык жактар тарабынан сууну алгачкы эсепке алуу ченемдеринин жана эрежелеринин; суу чарба системаларын жана курулмаларын куруу, коопсуз эксплуатациялоо, күтүү жана оңдоо эрежелеринин, ченемдеринин жана режимдеринин;

- өзүнүн компетенциясынын чегинде төмөнкү фактыларды алдын алууну жана аныктоону камсыздайт:

суу объекттеринде жана суу чарба системаларында иштерди рационалдуу эмес жүргүзүү; суу чарба курулмаларын күтүүнүн жана эксплуатациялоонун белгиленген режимдерин бузуу; сууну пайдалануунун иш жүзүндөгү көлөмдөрү жөнүндө маалыматты же суу пайдалануучулар тарабынан белгиленген тартипте берилүүчү башка маалыматтарды жашыруу же бурмалоо; суу ресурстарын булгоо, түгөтүү же алардын жарандык, өнөр жай объекттерине, айыл чарба жерлерине жана жаратылыш ландшафттарына тийгизген терс таасири;

6) суу чарба ишин башкаруу жана жөнгө салуу функциялары:

- ведомстволук уюмдардын жана ишканалардын ишин жетектейт;

- Ирригация жана дренаж боюнча комиссиянын ишин жетектейт;

- долбоорлорго мамлекеттик экспертиза жүргүзөт жана гидромелиоративдик курулмаларды курууга уруксаттарды берет;

- суу чарба капиталдык курулуш программаларын иштеп чыгат жана ишке ашырууну уюштурат;

- башка атайын ыйгарым укуктуу мамлекеттик органдар менен өз ара аракеттенүүдө суу чарба жана сууну коргоо долбоорлоруна, илимий-изилдөө, тажрыйба-конструктордук, долбоордук-изилдөө жана курулуш-монтаждоо иштерине мамлекеттик экспертиза жана мамлекеттик контроль жүргүзөт;

- суу чарба системаларын эксплуатациялоого кабыл алууга катышат;

- мамлекеттик ирригациялык жана коллектордук-дренаждык тармактарды күтүүнү, эксплуатациялоону, техникалык тейлөөнү, учурдагы жана капиталдык оңдоону уюштурат;

- суу фондунун жерлерин башкарууну уюштурат;

- суу объекттери үчүн сууну коргоо зоналарын жана тилкелерин күтүүнүн ченемдерин жана режимдерин иштеп чыгат жана Кыргыз Республикасынын Айыл, суу чарба жана аймактарды өнүктүрүү министрлигинин кароосуна киргизет жана алардын сакталышы боюнча иштерди уюштурат;

- мамлекеттин менчигинде турган ирригациялык курулмаларды эсепке алат;

- сугат суусун берүү боюнча түзүлгөн контракттарга жана ар жылдык келишимдерге ылайык суу алууну, сугат суусун суу пайдалануучуларга ташууну жана жеткирүүнү уюштурат;

- суу алуу, суу ресурстарын ташуу жана жеткирүү боюнча иштерди координациялайт жана жөнгө салат;

- коллектордук-дренаждык, саркынды жана агызма сууларды бөлүп берүү, тазалоо жана кайрадан пайдалануу ишин координациялайт;

7) суу мамилелерин экономикалык жөнгө салуу функциялары:

- контракттар жана келишимдер боюнча сууну берүү үчүн кызмат көрсөтүүлөргө, ошондой эле сууну жаратылыш ресурсу катары пайдаланууга акы төлөөнүн жол-жоболорун жана тарифтерин регламенттөөчү ченемдерди иштеп чыгат жана Кыргыз Республикасынын Айыл чарба министрлигинин кароосуна киргизет;

- суу берүүгө типтүү контракттарды жана ар жылдык келишимдерди иштеп чыгат жана белгиленген тартипте Кыргыз Республикасынын Айыл чарба министрлигинин кароосуна киргизет;

- сугат суусун берүү боюнча кызмат көрсөтүүлөр үчүн суу пайдалануучулардан төлөмдү чогултууну уюштурат;

- өзүнүн компетенциясынын чегинде улуттук суу фондун, мамлекеттин балансында турган суу чарба инфраструктурасын башкаруу жана өнүктүрүү максатына мамлекеттик бюджеттен бөлүнүүчү финансы каражаттарынын максаттуу пайдаланылышын жөнгө салат жана мониторинг жүргүзөт;

8) кызматтарды көрсөтүү функциялары:

- түзүлгөн контракттар жана келишимдер боюнча суу берүүнү камсыздайт;

- түзүлгөн келишимдер боюнча гидротехникалык, курулуш жана калыбына келтирүү иштерин аткарат;

- мамлекеттик жана муниципалдык кызматтарды көрсөтүү чөйрөсүндөгү мыйзамдарга ылайык башка мамлекеттик кызматтарды көрсөтөт;

9) колдоо функциялары:

- ведомстволук уюмдардын, суу чарба органдарынын персоналын, ошондой эле суу фермердик жана дыйкан чарбалардын, башка кызыкдар юридикалык жана жеке жактардын өкүлдөрүн суу ресурстарын пайдалануу маселелери боюнча окутууну, квалификациясын жогорулатууну уюштурат;

- суу пайдалануучулар ассоциацияларынын потенциалын чыңдоого жана өнүктүрүүгө методикалык жактан колдоо көрсөтөт;

- ички чарбалык сугаруучу жана дренаждык системаларды өнүктүрүүгө, айылдык калктуу конуштарды жана айыл чарба жерлерин суу каптоонун таасиринен коргоого байланышкан чараларды координациялайт жана колдоо көрсөтөт.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

13. Кызмат өзүнүн компетенциясынын чегинде жана ыйгарым укуктарын ишке ашыруу максатында төмөнкүлөргө укуктуу:

- мамлекеттик органдардан, жергиликтүү өз алдынча башкаруу органдарынан жана уюштуруу-укуктук формасына карабастан уюмдардан Кызматтын компетенциясына кирген маалыматтарды, сунуштарды жана корутундуларды белгиленген тартипте суроого жана алууга;

- суу ресурстарын башкаруу жана пайдалануу маселелери боюнча мамлекеттик программалардын, концепциялардын жана башка документтердин долбоорлорун иштеп чыгуу үчүн Кыргыз Республикасынын министрликтеринин, мамлекеттик комитеттеринин, административдик ведомстволорунун жана башка уюмдардын өкүлдөрүн, ошондой эле көз карандысыз эксперттерди тартууга;

- Кызматтын ишинин маселелери боюнча координациялык жана кеңешүүчү (кеңештерди, комиссияларды, топторду) органдарды түзүүгө;

- Кыргыз Республикасынын Министрлер Кабинетинин тапшырмасы боюнча жана анын атынан Кызматтын компетенциясына кирген маселелер боюнча Кыргыз Республикасынын кызыкчылыктарын мамлекеттер аралык (региондук) уюмдарда коргоого;

- эл аралык келишимдердин долбоорлорун иштеп чыгууга катышууга, өз компетенциясынын чегинде Кыргыз Республикасынын Айыл чарба министрлиги менен макулдашуу боюнча белгиленген тартипте эл аралык келишимдерди түзүүгө;

- суу чарба багытындагы айрым конструкцияларды жана түйүндөрдү текшерүү, имараттарды жана курулмаларды кабыл алуу үчүн ушул объекттерди эксплуатациялоого берүү үчүн мамлекеттик кабыл алуучу комиссияга тапшырганга чейин жумушчу комиссияларды түзүүгө жана алардын ишин уюштурууга;

- мамлекеттик заказдарды эске алуу менен Кызматтын бюджетин түзүүдө сунуштарды киргизүүгө жана катышууга;

- Кызматка белгиленген тартипте бекитилип берилген, негизги фонддордон, жүгүртүлүүчү каражаттардан, башка материалдык баалуулуктардан жана финансы ресурстарынан турган мүлктү пайдаланууга жана тескөөгө;

- өзүнүн компетенциясынын чегинде ведомстволук уюмдар жана суу чарба ишканалары тарабынан аткаруу үчүн милдеттүү болгон ченемдик техникалык актыларды чыгарууга;

- Кыргыз Республикасынын мамлекеттик сатып алуулар чөйрөсүндөгү мыйзамдарына ылайык товарларды, жумуштарды жана кызмат көрсөтүүлөрдү мамлекеттик сатып алууларды жүргүзүүгө же аны ведомстволук уюмдарга жана бөлүмдөргө тапшырууга;

- Кыргыз Республикасынын суу мыйзамдарында каралган суу ресурстарын берүү боюнча кызмат көрсөтүүлөр үчүн акы төлөө түрүндө келип түшкөн финансы каражаттарын атайын эсептерде топтоого;

- Кыргыз Республикасынын Айыл чарба министрлиги менен макулдашуу боюнча республикалык жана жергиликтүү бюджеттерден бөлүнүүчү, тышкы кредиттик жана донордук колдоо линиясы боюнча келип түшкөн, ошондой эле өзүнүн ишин жүргүзүүнүн натыйжасында топтолгон финансы каражаттарын пайдаланууну жөнгө салууга;

- суу мыйзамдарын бузуу фактылары жөнүндө материалдарды даярдоого жана укук коргоо органдарына же сот органдарына өткөрүп берүүгө;

- сотто доогер жана жоопкер катары чыгууга;

- суу мыйзамдарында каралган учурларда суу пайдалануу укугун чектөөгө же токтотуп турууга;

- суу мыйзамдарында каралган учурларда суу чарба системаларын, курулмаларды жана суу пайдалануучу ишканаларды курууну, реконструкциялоону, кеңейтүүнү, калыбына келтирүүнү жана эксплуатациялоону белгилүү бир мөөнөткө токтотуп турууга;

- жакынкы жана алыскы чет өлкөлөрдө Кызматтын адистери үчүн квалификацияны жогорулатууну, семинарларды, тренингдерди өткөрүүнү, тажрыйба алмашууну камсыздоого;

- юридикалык жана жеке жактардын өтүнмөлөрү боюнча белгиленген тартипте акы төлөнүүчү кызматтарды көрсөтүүгө;

- Кыргыз Республикасынын мыйзамдарына каршы келбеген башка укуктарды ишке ашырууга.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

14. Кызматты Кыргыз Республикасынын Айыл чарба министринин (мындан ары - министр) сунушу боюнча Кыргыз Республикасынын Министрлер Кабинетинин Төрагасы тарабынан кызмат ордуна дайындалуучу жана кызмат ордунан бошотулуучу директор башкарат. Кызматтын директору бир эле учурда Суу боюнча улуттук кеңештин катчылыгынын жетекчиси болуп саналат жана Кыргыз Республикасынын Суу кодексине ылайык Ирригация жана дренаж боюнча комиссияны башкарат.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

15.Директор:

- Кызматка жүктөлгөн милдеттерди, функцияларды жана ыйгарым укуктарды ишке ашыруу үчүн жеке жоопкерчилик тартат;

- Кызматтын борбордук аппаратынын, түзүмдүк бөлүмдөрүнүн, ведомстволук уюмдарынын жана ишканаларынын түзүмүн, штаттык расписаниесин жана чыгымдар сметасын иштеп чыгат жана министрге бекитүү үчүн берет;

- Кыргыз Республикасынын Айыл чарба министрлигине ведомстволук уюмдарды жана ишканаларды түзүү, кайра уюштуруу жана жоюу жөнүндө сунуштарды белгиленген тартипте киргизет;

- ведомстволук уюмдардын жана ишканалардын ишин уюштурат жана контролдойт;

- өзүнүн орун басарларынын, түзүмдүк бөлүмдөрдүн жетекчилеринин жана Кызматтын, ведомстволук уюмдардын жана ишканалардын кызматкерлеринин функциялык милдеттерин белгилейт;

- Кызматтын борбордук аппаратынын кызматкерлерин, аймактык, ведомстволук уюмдардын жана ишканалардын жетекчилерин министр тарабынан бекитилүүчү кызмат орундарынын номенклатурасына ылайык кызмат ордуна дайындайт жана ээлеген кызмат ордунан бошотот;

- Кызматтын борбордук аппаратынын түзүмдүк бөлүмдөрү, аймактык, ведомстволук уюмдары жана ишканалары жөнүндө жоболорду бекитет;

- Кызматтын коллегиясы жөнүндө жобону бекитет жана анын ишин жетектейт;

- өзүнүн компетенциясынын чегинде буйруктарды, тескемелерди, нускамаларды чыгарат жана белгиленген тартипте ведомстволук ченемдик актыларды бекитет;

- Кызматтын балансында турган мүлктү жана каражаттарды башкарат, Кыргыз Республикасынын жарандык мыйзамдарына ылайык Кызматтын финансылык жана чарбалык-тескөөчү ишин уюштурат;

- мамлекеттик, мамлекеттер аралык жана чет өлкөлүк уюмдар, юридикалык жана жеке жактар менен болгон мамилелерде Кызматтын атынан чыгат, Кызматтын атынан келишимдерди, контракттарды жана макулдашууларды түзөт, ушул иштерди аткарууга ишеним каттарды берет;

- өзүнүн компетенциясынын чегинде Кызматтын борбордук аппаратынын, ведомстволук жана аймактык уюмдардын кызматкерлерин сыйлайт, Кыргыз Республикасынын эмгек мыйзамдарында, Кыргыз Республикасынын мамлекеттик жарандык кызмат жана муниципалдык кызмат чөйрөсүндөгү мыйзамдарында каралган тартиптик жоопкерчилик чараларын колдонот;

- Кыргыз Республикасынын мыйзамдарына ылайык башка ыйгарым укуктарды аткарат.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

16. Кызматта директорунун орун басарларынын кызмат орундары каралган.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

17. Директордун орун басарлары мамлекеттик жарандык кызмат чөйрөсүндөгү Кыргыз Республикасынын мыйзамдарында жана Кыргыз Республикасынын эмгек мыйзамдарында каралган тартипте министр тарабынан кызмат ордуна дайындалат жана кызмат ордунан бошотулат, түздөн-түз Кызматтын директоруна баш ийишет жана аларга жүктөлгөн милдеттердин чегинде Кызматтын ишин уюштурушат.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

18. Кызматта коллегия түзүлөт. Директор жана анын орун басарлары кызмат орду боюнча коллегиянын мүчөлөрү болуп саналат. Коллегиянын курамы Кызматтын директорунун сунушу боюнча Кыргыз Республикасынын айыл чарба министринин буйругу менен бекитилет.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

19. Кызматтын бирдиктүү техникалык саясатын түзүү жана суу мамилелери жаатындагы орчундуу проблемаларды квалификациялуу чечүү, суу фондун сарамжалдуу пайдаланууну жана коргоону камсыздоо максатында Кызматта илимий-техникалык кеңеш түзүлөт, аны директор башкарат. Илимий-техникалык кеңештин иши жөнүндө жобо жана анын жекече курамы Кызматтын директору тарабынан бекитилет.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

20. Ведомстволук жана аймактык бөлүмдөр ишин өз алдынча жүргүзүшөт, түздөн-түз Кызматка баш ийишет жана ага өзүнүн иши жөнүндө отчет беришет.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

21. Кызматтын алдында илимий-техникалык эксперттердин жумушчу топтору уюштурулушу мүмкүн.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

22. Кызматты кайра уюштуруу же жоюу Кыргыз Республикасынын Министрлер Кабинетинин чечимине ылайык жүргүзүлөт.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)

23. Кызматтын иши токтотулган учурда, анын уюштуруу жана архивдик документтери "Кыргыз Республикасынын улуттук архив фонду жөнүндө" Кыргыз Республикасынын Мыйзамына ылайык пайдаланылууга жана сакталууга тийиш.

(КР Министрлер Кабинетинин 2021-жылдын 24-декабрындагы № 347 токтомунун редакциясына ылайык)