Кыргыз Республикасынын Юстиция министрлигине караштуу Жазаларды аткаруу кызматынын «Келечек» мамлекеттик ишканасынын УСТАВЫ

4-тиркеме (Кыргыз Республикасынын Министрлер Кабинетинин 2021-жылдын 21-июнундагы № 33 токтомуна)

Кыргыз Республикасынын Юстиция министрлигине караштуу Жазаларды аткаруу кызматынын "Келечек" мамлекеттик ишканасынын УСТАВЫ (КР Министрлер Кабинетинин 2021-жылдын 24-декабрындагы № 350 токтомунун редакциясына ылайык)

1. Жалпы жоболор

1. Кыргыз Республикасынын Юстиция министрлигине караштуу Жазаларды аткаруу кызматынын "Келечек" мамлекеттик ишканасы (мындан ары - Ишкана) Кыргыз Республикасынын Граждандык кодексинин 158-беренесине, "Жазык-аткаруу (пенитенциардык) тутумунун органдары жана мекемелери жөнүндө" Кыргыз Республикасынын Мыйзамына ылайык түзүлгөн.

(КР Министрлер Кабинетинин 2021-жылдын 24-декабрындагы № 350 токтомунун редакциясына ылайык)

2. Ишкана өз ишинде Кыргыз Республикасынын Конституциясын, Кыргыз Республикасы катышкан, мыйзамда белгиленген тартипте күчүнө кирген эл аралык келишимдерди Кыргыз Республикасынын мыйзамдарын жана башка ченемдик укуктук актыларды, ошондой эле ушул Уставды жетекчиликке алат.

3. Ишкананын уюштуруучусу болуп Кыргыз Республикасынын Министрлер Кабинети саналат. Ишкана Кыргыз Республикасынын Юстиция министрлигине караштуу Жазаларды аткаруу кызматына (мындан ары - ЖАК) түздөн-түз баш ийүүсүндө турат, ал Кыргыз Республикасынын мыйзамдарынын талаптарына жана ушул Уставга ылайык Ишкананын ишине жалпы жетекчиликти жана координацияны ишке ашырат.

(КР Министрлер Кабинетинин 2021-жылдын 24-декабрындагы № 350 токтомунун редакциясына ылайык)

4. Ишкананын толук расмий аталышы:

- мамлекеттик тилде: "Кыргыз Республикасынын Юстиция министрлигине караштуу Жазаларды аткаруу кызматынын "Келечек" мамлекеттик ишканасы";

- расмий тилде: "Государственное предприятие "Келечек" Службы исполнения наказаний при Министерстве юстиции Кыргызской Республики".

(КР Министрлер Кабинетинин 2021-жылдын 24-декабрындагы № 350 токтомунун редакциясына ылайык)

5. Ишкана белгиленген тартипте Кыргыз Республикасынын аймагында филиалдарды жана өкүлчүлүктөрдү ачууга укуктуу.

6. Ишкана мамлекеттик ишкананын уюштуруу-укуктук формасында түзүлгөн, чарба жүргүзүү укугуна негизделген юридикалык жак болуп саналат, өз алдынча балансы, Кыргыз Республикасынын банктарында, башка финансы-кредиттик мекемелеринде жана чет өлкөлөрдө эсептери (анын ичинде алыш-бериш жана валюталык), мамлекеттик жана расмий тилдерде өзүнүн аталышы жазылган мөөрү, штампы, бланктары жана башка атрибуттары бар.

7. Ишкана Кыргыз Республикасынын мыйзамдарынын алкагында ишкердик жүргүзөт жана өзүн-өзү каржылоо принцибинде иштейт.

8. Ушул Уставга өзгөртүүлөр жана толуктоолор Кыргыз Республикасынын мыйзамдарында белгиленген тартипте Кыргыз Республикасынын Министрлер Кабинетинин чечими менен киргизилет.

9. Ишкананын юридикалык дареги: Кыргыз Республикасы, Бишкек шаары, Орозбеков, 281а.

(КР Министрлер Кабинетинин 2021-жылдын 24-декабрындагы № 350 токтомунун редакциясына ылайык)

2. Ишкананын ишинин максаттары жана милдеттери

10. Ишкана Кыргыз Республикасынын жазык-аткаруу системасынын киреше алып келүүчү ишин жана социалдык чөйрөсүн өнүктүрүү, соттолгондорго жаза өтөө үчүн жагымдуу шарттарды түзүү жана соттолгондорду эмгекке тартуу максатында түзүлгөн.

11. Ишкананын негизги милдеттери болуп төмөнкүлөр саналат:

- соттолгондорду иш менен камсыз кылуу;

- өндүрүштүк ишти жүзөгө ашыруу;

- продукцияны жана товарларды сатуу;

- тооруктарды өткөрүү, тооруктарга чыгарылган товарлар боюнча суроо-талапты жана сунуштарды аныктоо;

- Кыргыз Республикасынын мыйзамдарында белгиленген тартипте мамлекеттик сатып алууларды жүргүзүү жана аларга катышуу;

- функциялык милдеттерди чечүү үчүн түз инвестицияларды тартуу;

- мыйзамдардын алкагында башка ишкердикти жүргүзүү.

3. Ишкананын укуктары жана милдеттери

12. Ишкана ушул Устав менен аныкталган максаттарга жетүү жана милдеттерди аткаруу үчүн төмөнкүлөргө укуктуу:

- белгиленген тартипте соода бюллетенин, маалымдамаларды, ошондой эле башка маалыматтык жана жарнамалык басылмаларды чыгарууга;

- белгиленген тартипте юридикалык жана жеке жактардан накталай жана накталай эмес эсептешүү менен материалдык ресурстарды, мүлктү, анын ичинде негизги каражаттарды сатып алууга;

- обочолонгон мүлккө ээ болууга, өзүнүн атынан мүлктүк жана жеке мүлктүк эмес укуктарга ээ болууга, ошондой эле милдеттерди аткарууга, соттордо доогер жана жоопкер болууга;

- уюштуруу-укуктук формасына жана менчигинин түрүнө карабастан бардык юридикалык жактар, ошондой эле жарандар менен Ишкананын ишинин максаттарына жана милдеттерине ылайык, берилген ыйгарым укуктардын чегинде өз алдынча келишимдерди түзүүгө;

- түзүлгөн жарандык-укуктук келишимдердин негизинде Ишкананын кызматкерлерине консультация берүү, окутуу үчүн жана башка максаттарда тараптардын макулдашуусу боюнча акы төлөө менен адистерди тартууга;

- Ишкананын тапшырмаларын аткарган адамдарды командировкаларга, анын ичинде чет өлкөлөргө, ошондой эле эл аралык конференцияларга, семинарларга, көргөзмөлөргө катышуу үчүн жиберүүгө;

- Кыргыз Республикасынын мыйзамдарына ылайык тышкы экономикалык ишти жүргүзүүгө;

- эмгек жана жарандык-укуктук келишимдердин негизинде жарандарды, анын ичинде соттолгондорду мыйзамдарда белгиленген тартипте Ишканадагы жумуштарды аткарууга тартууга;

- өндүрүштүк, соода-сатып алуу иштерин, товарларды экспорттоону жана импорттоону жүргүзүүгө;

- уставдык милдеттерге ылайык Кыргыз Республикасынын аймагында өндүрүштүк иштерди жүргүзүү үчүн зарыл болгон өндүрүштүк участокторду белгиленген тартипте түзүүгө;

- коммерциялык негизде улуттук, ошондой эле чет өлкөлүк валюталарда алынган кредиттик каражаттарды Кыргыз Республикасынын мыйзамдарында белгиленген тартипте пайдаланууга;

- жарнама берүүчү катары чыгууга;

- көрсөткөн кызматтары үчүн акы алууга.

Ишкана Кыргыз Республикасынын мыйзамдарына жана ушул Уставга карама-каршы келбеген башка укуктарга ээ.

13. Ишкана төмөнкүлөргө милдеттүү:

- бардык иштегендер үчүн коопсуз эмгек шарттарын камсыздоого;

- Кыргыз Республикасынын мыйзамдарына жана уставдык ишти камсыз кылуу максатында түзүлгөн келишимдерге ылайык милдеттенмелерди аткарууга;

- Ишкананын кызматкерлерин социалдык, медициналык жактан жана милдеттүү камсыздандыруунун башка түрлөрү, ошондой эле алар үчүн эмгектин коопсуз шарттары менен камсыз кылууга, алардын ден соолугуна келтирилген зыян үчүн Кыргыз Республикасынын мыйзамдарында белгиленген тартипте жоопкерчиликти тартууга;

- салык жана башка органдарга Ишкананын отчетторун өз убагында берүүгө, салыктарды жана чегерүүлөрдү Кыргыз Республикасынын мыйзамдарында аныкталган тартипте жана өлчөмдө төлөөгө.

Ишкана Кыргыз Республикасынын мыйзамдарына жана ушул Уставга карама-каршы келбеген, ушул Уставда каралбаган башка милдеттерге да ээ.

4. Ишкананы башкаруу

14. Директор Ишкананын жетекчиси болуп саналат. Директор Ишкананын жетекчиси кызмат ордуна квалификациялык талаптарга ылайык келген, Кыргыз Республикасынын юстиция министри тарабынан сунушталган талапкерлердин арасынан мамлекеттик мүлктү башкаруу чөйрөсүндөгү ыйгарым укуктуу мамлекеттик органдын сунушу боюнча Кыргыз Республикасынын Министрлер Кабинетинин Төрагасы тарабынан кызмат ордуна дайындалат.

Директор үч жылдык мөөнөткө дайындалат, Кыргыз Республикасынын мыйзамдарында каралган тартипте укуктарга жана милдеттерге ээ болот, жоопкерчилик тартат жана ушул Уставдын негизинде иштейт. Ишкананын директору мамлекеттик мүлктү башкаруу чөйрөсүндөгү ыйгарым укуктуу органдын ЖАК менен макулдашылган сунушу боюнча Кыргыз Республикасынын Министрлер Кабинетинин Төрагасы тарабынан кызмат ордунан бошотулат. (КР Министрлер Кабинетинин 2021-жылдын 24-декабрындагы № 350 токтомунун редакциясына ылайык)

15. Ишкананын директору Ишкананын атынан ишеним катсыз иштейт, келишимдерди, анын ичинде эмгек келишимдерин түзөт, ишеним каттарды берет, банктарда алыш-бериш жана башка эсептерди ачат, каражаттарды тескөө укугун пайдаланат, белгиленген тартипте Ишкананын бардык кызматкерлери үчүн аткарууга милдеттүү болгон буйруктарды чыгарат жана көрсөтмөлөрдү берет.

ЖАК менен биргеликте Ишкананын өндүрүш ишин пландоону, талдоону ишке ашырат жана Ишкананын өндүрүш ишинен түшкөн таза кирешени чыгымдоонун артыкчылыктуу багыттарын аныктайт, ошондой эле өндүрүштүк зарылчылык болгон учурда Ишкананын түзүмүн оптималдаштыруу боюнча сунуштарды киргизет. (КР Министрлер Кабинетинин 2021-жылдын 24-декабрындагы № 350 токтомунун редакциясына ылайык)

16. Ишкананын директору соттордо мүлктүн менчик ээсинин кызыкчылыктарын коргоого, башка уюмдар, ишканалар, ошондой эле ижарачылар менен өзүнүн ыйгарым укуктарынын чегинде мамиле түзүүгө укуктуу.

17. Ишкананын директорунун орун басарлары Ишкананын директорунун сунушу менен мамлекеттик мүлктү башкаруу чөйрөсүндөгү ыйгарым укуктуу мамлекеттик орган тарабынан кызмат ордуна дайындалат жана кызмат ордунан бошотулат.

(КР Министрлер Кабинетинин 2021-жылдын 24-декабрындагы № 350 токтомунун редакциясына ылайык)

18. Ишкананын штаттык түзүмү жана штаттык ырааттамасы Ишкананын директору тарабынан мамлекеттик мүлктү башкаруу чөйрөсүндөгү ыйгарым укуктуу орган менен макулдашуу боюнча бекитилет.

(КР Министрлер Кабинетинин 2021-жылдын 24-декабрындагы № 350 токтомунун редакциясына ылайык)

19. Ишкананын ишинин ачык-айкындыгын жана объективдүүлүгүн камсыз кылуу үчүн анын алдында Байкоочу кеңеш түзүлөт, мында анын мүчөлөрүнүн жарымынан кем эмеси жарандык сектордун өкүлдөрү болуп саналат. Байкоочу кеңеш жөнүндө жобо ЖАКнын буйругу менен бекитилет.

(КР Министрлер Кабинетинин 2021-жылдын 24-декабрындагы № 350 токтомунун редакциясына ылайык)

20. Ишкананын ишин текшерүү зарыл болгон учурда ЖАК Ишкананын ишине аудит жүргүзүүнү, Ишкананын материалдык-техникалык каражаттарын ревизиялоону, чыгарылуучу продукцияга лабораториялык жана башка сыноолорду, текшерүүлөрдү жүргүзүүнү, таанышуу максатында жайларды жана өндүрүштүк участокторду кароону демилгелөөгө укуктуу.

(КР Министрлер Кабинетинин 2021-жылдын 24-декабрындагы № 350 токтомунун редакциясына ылайык)

5. Эсепке алуу, пландоо жана отчеттуулук

21. Ишкана өзүнүн ишин иштелип чыккан иш пландарынын негизинде жүргүзөт жана соттолгондор үчүн жумуш орундарынын жетиштүү санын түзүү зарылдыгын, ошондой эле керектөөчүлөрдүн чыгарылуучу продукциянын түрлөрүнө, жумуштарга жана кызмат көрсөтүүлөргө болгон суроо-талаптарын эске алуу менен өнүктүрүүнүн келечегин аныктайт.

Стратегиялык өнүктүрүү планы Ишкана тарабынан үч жылдык мезгилге иштелип чыгат жана ЖАК тарабынан бекитилет. (КР Министрлер Кабинетинин 2021-жылдын 24-декабрындагы № 350 токтомунун редакциясына ылайык)

22. Ишкананын иш пландарынын негизин ишкананын жабдуучулар, ижарачылар жана керектөөчүлөр менен болгон мамилелерин жөнгө салуучу узак мөөнөттүү жана башка келишимдер түзөт.

23. Ишкана Кыргыз Республикасынын мыйзамдарына карама-каршы келбеген келишимдин предметин тандоодо, милдеттенмелерди, чарбалык өз ара мамилелердин башка бардык шарттарын эркин тандайт.

24. Ишкана өзүнүн ишинин натыйжаларын бухгалтердик эсепке алууну ишке ашырат жана Кыргыз Республикасынын мыйзамдарында белгиленген тартипте статистикалык отчеттуулукту жүргүзөт.

25. Ишкана компетенттүү мамлекеттик органдарга салык салуу жана экономикалык маалыматтарды берүүнүн жана иштеп чыгуунун жалпы мамлекеттик системасын жүргүзүү үчүн зарыл болгон маалыматтарды берет.

Кыргыз Республикасынын мыйзамдарында белгиленген тартипте суралган маалыматты берүүдөн баш тартуу, толук эмес маалымат берүү же аны бурмалоо, ошондой эле отчетту бурмалоо үчүн Ишкананын кызмат адамдары Кыргыз Республикасынын мыйзамдарында белгиленген жоопкерчиликти тартышат.

26. Ишкананын башкы бухгалтери ишке Ишкананын директору тарабынан дайындалат, түздөн-түз директорго баш иет, Кыргыз Республикасынын мыйзамдарында белгиленген жоопкерчиликти тартат жана укуктарды пайдаланат.

27. Ишкананын ишин текшерүү Кыргыз Республикасынын тиешелүү контролдоочу мамлекеттик органдары жана ЖАМК тарабынан Кыргыз Республикасынын мыйзамдарына ылайык жүргүзүлөт.

(КР Министрлер Кабинетинин 2021-жылдын 24-декабрындагы № 350 токтомунун редакциясына ылайык)

6. Ишкананын мүлкү жана финансы каражаттары

28. Ишкана ыйгарым укуктуу орган тарабынан толук өткөрүп берилген мүлккө карата өзүнүн ишинин максаттарына жана мүлктүн багытына ылайык ушул Уставда аныкталган шарттарда жана тартипте чарба жүргүзүү укугуна ээ.

Ишкана ага чарба жүргүзүү укугунда таандык болгон кыймылсыз мүлктү менчик ээсинин макулдугусуз сатууга, ижарага, күрөөгө берүүгө, чарбалык коомдордун жана шериктештиктердин уставдык капиталына салым (пай) катары киргизүүгө же башка ыкма менен тескөөгө укуксуз. Ишканага чарба жүргүзүү укугунда таандык болгон калган мүлктү Кыргыз Республикасынын мыйзамдарында белгиленген учурлардан тышкары өз алдынча тескейт.

29. Ишкананын мүлкүн негизги фонддор жана жүгүртүлүүчү каражаттар, ошондой эле наркы Ишкананын өз алдынча балансында көрсөтүлүүчү башка материалдык баалуулуктар түзөт.

30. Мүлктү түзүү булактары болуп төмөнкүлөр эсептелет:

- чарбалык ишинин натыйжасында түшкөн кирешелер;

- банктардын жана башка кредиторлордун кредиттери;

- эл аралык донорлордун жана коммерциялык эмес уюмдардын каражаттары;

- уюмдардын, ишканалардын жана жарандардын кайрымдуулук каражаттары;

- Кыргыз Республикасынын мыйзамдарында тыюу салынбаган башка булактар.

31. Ишкананын ишинен алынган бардык каражаттар милдеттүү төлөмдөрдү төлөгөндөн кийин Ишкананын карамагына түшөт жана жазык-аткаруу системасынын мекемелеринин өндүрүштүк ишин өнүктүрүү, ошондой эле соттолгондорду кармоо шарттарын жакшыртуу үчүн пайдаланылат.

7. Ишкананы кайра уюштуруу жана жоюу

32. Ишкананы кайра уюштуруу (бириктирүү, кошуу, бөлүү, бөлүп чыгаруу, кайра түзүү) Кыргыз Республикасынын жарандык мыйзамдарына ылайык ишке ашырылат.

33. Кыргыз Республикасынын юридикалык жактарынын мамлекеттик реестрине тиешелүү жазуу киргизилген учурдан тартып Ишкана кайра уюштурулган же жоюлган болуп эсептелет.

34. Ишкананын иш процессинде пайда болгон документтер "Кыргыз Республикасынын улуттук архив фонду жөнүндө" Кыргыз Республикасынын Мыйзамына ылайык пайдаланылат жана сакталат.