Кыргыз Республикасынын Юстиция министрлигине караштуу Жазаларды аткаруу кызматынын Түзөтүү мекемелерин кайтаруу, соттолгондорду жана камакка алынган адамдарды конвой менен коштоп жүрүү боюнча департаменти жөнүндө жобо (Кыргыз Республикасынын Министрлер Кабинетинин токтомуна ылайык)

Кыргыз Республикасынын Министрлер Кабинетинин 2024-жылдын 16-февралындагы № 59 токтомуна ылайык КҮЧҮН ЖОГОТТУ

3-тиркеме

(Кыргыз Республикасынын Министрлер Кабинетинин 2021-жылдын 21-июнундагы № 33 токтомуна ылайык)

Кыргыз Республикасынын Юстиция министрлигине караштуу Жазаларды аткаруу кызматынын Түзөтүү мекемелерин кайтаруу, соттолгондорду жана камакка алынган адамдарды конвой менен коштоп жүрүү боюнча департаменти жөнүндө жобо (КР Министрлер Кабинетинин 2021-жылдын 24-декабрындагы № 350 токтомнун редакцияларына ылайык)

1. Жалпы жоболор

1. Ушул Жобо Кыргыз Республикасынын Юстиция министрлигине караштуу Жазаларды аткаруу кызматынын (мындан ары - ЖАК) Түзөтүү мекемелерин кайтаруу, соттолгондорду жана камакка алынган адамдарды конвой менен коштоп жүрүү боюнча департаментинин (мындан ары - Департамент) ишинин тартибин аныктайт. Департамент түзөтүү мекемелерин кайтаруу жана коргоо, камакка алынган адамдарды түзөтүү мекемелеринен жана тергөө изоляторлорунан Кыргыз Республикасынын мыйзамдарына (мындан ары - мыйзамдар) ылайык конвой менен коштоп жүрүү, жарандардын конституциялык укуктарын жана эркиндиктерин сактоо жана Кыргыз Республикасынын Министрлер Кабинетинин, Кыргыз Республикасынын юстиция министринин (мындан ары - юстиция министри) жана ЖАКнын төрагасынын атайын тапшырмаларын аткаруу боюнча функцияларды жүзөгө ашырат.

(КР Министрлер Кабинетинин 2021-жылдын 24-декабрындагы № 350 токтомнун редакцияларына ылайык)

2. Департамент ЖАКтын ведомстволук бөлүмү, уюштуруу-укуктук формасы боюнча мекеме болуп эсептелет.

Департаменттин аскер кызматчыларына Кыргыз Республикасынын Конституциясы, Кыргыз Республикасынын мыйзамдары, аскер кызматчыларынын статусун жана Кыргыз Республикасынын Куралдуу Күчтөрүндө кызмат өтөөнү жөнгө салуучу башка ченемдик укуктук актылар колдонулат. (КР Министрлер Кабинетинин 2021-жылдын 24-декабрындагы № 350 токтомнун редакцияларына ылайык)

3. Департамент өз ишинде Кыргыз Республикасынын Конституциясын, Кыргыз Республикасы катышуучу болуп эсептелген, мыйзамдарда белгиленген тартипте күчүнө кирген эл аралык келишимдерди жана макулдашууларды, Кыргыз Республикасынын мыйзамдарын, башка ченемдик укуктук актыларын, ошондой эле ушул Жобону жетекчиликке алат.

4. Департамент өзүнө жүктөлгөн милдеттерди ЖАКнын түзөтүү мекемелеринин администрациясы, Кыргыз Республикасынын Юстиция министрлиги (мындан ары – Министрлик), Кыргыз Республикасынын соттору, укук коргоо органдары, Кыргыз Республикасынын Коргоо министрлигинин (мындан ары - Коргоо министрлиги) мекемелери менен өз ара аракеттенүүдө, ал эми согуштук жана өзгөчө абалдар жарыяланганда - Кыргыз Республикасынын мыйзамдарына ылайык аткарат.

(КР Министрлер Кабинетинин 2021-жылдын 24-декабрындагы № 350 токтомнун редакцияларына ылайык)

5. Кызматтык-күжүрмөн милдеттерди түздөн-түз аткарууда Департаменттин бөлүмдөрү, кароолдору, кезметтери улук ыкчам жана ыкчам начальниктерге ыкчам баш ийүүгө өтүшөт.

Улук ыкчам начальниктер болуп төмөнкүлөр эсептелет:

- юстиция министри, юстиция министринин орун басары (мындан ары - министрдин тейлеген орун басары), ЖАКнын төрагасы - Департаменттин начальнигине карата;

- ЖАКнын төрагасынын орун басарлары - Департаменттин өзүнчө батальондорунун командирлерине карата.

Ыкчам начальниктер болуп төмөнкүлөр эсептелет:

- түзөтүү мекемелеринин начальниктери - мекемени коргоону жүзөгө ашырган роталардын командирлерине жана кароол начальниктерине карата;

- ЖАКнын жетекчилик курамынын адамдары - кызматтык-күжүрмөн милдеттерди аткаруу үчүн убактылуу баш ийүүгө бөлүнгөн аскер кезметтеринин начальниктерине карата.

Соттордогу кароолдордун начальниктери сот процесси жүргүзүлүп жаткан учурда сот жыйналышынын төрагалык кылуучусуна ыкчам баш ийүүдө болушат. Улук ыкчам начальниктердин милдеттери жана укуктары мыйзамдарга ылайык аныкталат. (КР Министрлер Кабинетинин 2021-жылдын 24-декабрындагы № 350 токтомнун редакцияларына ылайык)

6. Департаменттин аскер кызматчылары милдеттерин аткарууда мамлекеттик органдарга жана юридикалык жактарга көмөк көрсөтүүсү үчүн кайрылууга укуктуу.

7. Департамент юридикалык жактын укук жөндөмдүүлүгүнө ээ, мамлекеттик жана расмий тилдерде өзүнүн фирмалык аталышы менен Кыргыз Республикасынын Мамлекеттик гербинин сүрөтү түшүрүлгөн мөөрү, белгиленген үлгүдөгү башка мөөрлөрү, штамптары жана бланктары, ошондой эле мыйзамдарга ылайык ачылган эсептери бар.

8. Департамент өзүнүн атынан мүлктүк жана жеке мүлксүз укуктарды алууга жана милдеттерди аткарууга, келишимдерди түзүүгө, сотто доогер жана жоопкер болууга, ыкчам башкаруу укугунда обочолонгон мүлккө, негизги жана жүгүртмө каражаттарга ээ болууга, өз алдынча баланс жүргүзүүгө укуктуу.

9. Департаменттин толук фирмалык аталышы:

мамлекеттик тилде: «Кыргыз Республикасынын Юстиция министрлигине караштуу Жазаларды аткаруу кызматынын Түзөтүү мекемелерин кайтаруу, соттолгондорду жана камакка алынган адамдарды конвой менен коштоп жүрүү боюнча департаменти»; расмий тилде: «Департамент по охране исправительных учреждений и конвоированию осужденных и лиц, заключенных под стражу Службы исполнения наказаний при Министерстве юстиции Кыргызской Республики Департаменттин кыскартылган аталышы: мамлекеттик тилде: "ККД"; расмий тилде: "ДОК"; (КР Министрлер Кабинетинин 2021-жылдын 24-декабрындагы № 350 токтомнун редакцияларына ылайык)

10. Департаменттин юридикалык дареги: 720021, Бишкек шаары, Медеров көчөсү, 94.

2. Департаменттин иш принциптери

11. Департаменттин иши мыйзамдуулук, адам укуктарын урматтоо, жеке башкаруу, башкарууну борборлоштуруу, ыктыярдуу тартипте келишим боюнча Департаментти комплекттөө принциптеринин негизинде, ал эми комплекттөөнүн келишимдик принцибине өткөнгө чейин - чакыруу боюнча жүргүзүлөт.

3. Департаменттин милдеттери

12. Департаменттин негизги милдеттери болуп төмөнкүлөр эсептелет:

- түзөтүү мекемелерин, Министрликтин борбордук аппаратынын имаратын кайтаруу жана коргоо;

- соттолгондорду жана камакка алынган адамдарды компетенциясынын чегинде конвой менен коштоп жүрүү;

- атайын жүктөрдү кайтаруу жана коргоо;

- коомдук коопсуздукту жана өзгөчө абалдын укуктук режимин камсыз кылуу боюнча Кыргыз Республикасынын укук коргоо органдарына көмөк көрсөтүү.

(КР Министрлер Кабинетинин 2021-жылдын 24-декабрындагы № 350 токтомнун редакцияларына ылайык)

4. Департаменттин функциялары

13. Департамент өзүнө жүктөлгөн милдеттерге ылайык төмөнкүдөй функцияларды жүзөгө ашырат:

1) жүктөлгөн милдеттерди аткарууга, анын ичинде Кыргыз Республикасынын мамлекеттик кызыкчылыктарын жана коопсуздугун коргоо боюнча өздүк курамды күжүрмөн даярдыкта кармайт;

2) режимдик объекттерди жана атайын жүктөрдү кайтарат;

3) соттолгондорду жана камакка алынган адамдарды компетенциясынын чегинде түзөтүү мекемелерине, тергөө изоляторлоруна, Бишкек шаарында жайгашкан сотторго жана ал соттордун көчмө сессиялары жүрүп жаткан жайларга, ошондой эле Кыргыз Республикасынын эл аралык милдеттенмелерин аткарууда аларды экстрадициялоо учурунда конвой менен коштоп жүрөт;

4) кайтаруудан качып чыккан адамдарды, Департаменттин бөлүмдөрүн өз алдынча таштап кеткен мөөнөттүү кызматтагы аскер кызматчыларын, ошондой эле кайтаруудагы Департаменттин объекттерине кирип келген адамдарды издөөгө жана кармоого катышат;

5) жапырт эпидемиялардын жана эпизоотиялардын, жапырт жабырландыруучу куралдарды колдонуунун, ири өрттүн жана табигый кырсыктардын кесепеттерин жоюу шарттарындагы карантиндик иш-чараларды жүзөгө ашырууда тартипти жана мыйзамдуулукту камсыз кылууга катышат;

6) түзөтүү мекемелеринде соттолгондорду, ошондой эле камакка алынган адамдарды темир жол же автомобиль транспортунда конвой менен алып жүрүүдө, сот мекемелеринде алардын жапырт баш ийбөөчүлүгүнө жана баш аламандыгына бөгөт коюу боюнча чараларды көрөт.

Департаменттин аскер кызматчыларын 11-пункттун 5 жана 6-пунктчаларында аталган милдеттерди аткарууга тартуу юстиция министринин жана ЖАКнын төрагасынын чечими боюнча ишке ашырылат. Түзөтүү мекемелерин кайтаруу жана соттолгондорду, камакка алынган адамдарды конвой менен коштоп жүрүү боюнча милдеттерди аткарган Департаменттин аскер кызматчылары табелдик курал, байланыш каражаттары жана атайын коргонуу каражаттары менен камсыз кылынат. Милдеттерди аткаруу, ошондой эле куралдарды жана атайын каражаттарды колдонуу тартиби мыйзамдарга ылайык аныкталат. (КР Министрлер Кабинетинин 2021-жылдын 24-декабрындагы № 350 токтомнун редакцияларына ылайык)

14. Департаменттин аскер кызматчылары милдеттерин аткаруу үчүн белгиленген ченемдерге ылайык зарыл болгон атайын каражаттар, курал-жарактар, аскердик жана атайын техника менен камсыз кылынат.

5. Департаменттин укуктары

15. Аскер кызматчыларына төмөнкүдөй укуктар берилет:

- издөө иш-чараларын жүргүзүүдө эгер жарандар кайтаруудан качып чыккан деген шек туудурган болсо, ким экендигин күбөлөндүргөн документтерин текшерүүгө жана ким экендигин аныктоо үчүн аларды ички иштер органдарына жеткирүүгө;

- кайтаруудан качууга шектүү адамдарды издөөдө менчигинин түрлөрүнө карабастан мекемелердин, ишканалардын жана уюмдардын жайларына мыйзам тарабынан каралган соттун чечими жана прокурордун санкциясын алуу керек болбогон шарттардан башка учурларда кирүүгө;

- кечиктирилгис учурларда жогоруда аталган адамдарды издеп табууну уюштуруу үчүн менчигинин түрлөрүнө карабастан ишкананын, мекеменин жана уюмдардын байланыш, транспорт каражаттарын пайдаланууга (атайын жана дипломаттык унаалардан тышкары).

16. Департаменттин аскер кызматчылары кызматтык милдеттерин аткарууда мыйзамдарга ылайык күч ыкмаларын, атайын каражаттарды жана куралдарды колдонууга укуктуу.

Атайын каражаттардын тизмесин жана аларды колдонуунун эрежелерин Кыргыз Республикасынын Министрлер Кабинети аныктайт.

6. Департаменттин ишин уюштуруу

17. Департаментти түздөн-түз начальник башкарат. Департаменттин начальниги юстиция министринин сунуштамасы боюнча Кыргыз Республикасынын Министрлер Кабинетинин Төрагасы тарабынан кызмат ордуна дайындалат жана кызмат ордунан бошотулат. Начальниктин орун басарлары бар, анын ичинен - биринчиси департаменттин начальнигинин сунуштамасы боюнча ЖАКнын төрагасы тарабынан кызмат ордуна дайындалат жана кызмат ордунан бошотулат. Департаменттин начальниги Департаменттин ишин уюштурат жана жетектейт, Департаментке жүктөлгөн милдеттердин аткарылышы жана өз функцияларынын жүзөгө ашырылышы, күжүрмөн даярдыкты сактоо, Департаменттин бөлүмдөрүнө өз убагында милдеттерди коюу жана алардын сапаттуу аткарылышы үчүн жеке жоопкерчилик тартат.

Департаменттин начальниги ЖАКнын төрагасынын орун басары болуп эсептелет. (КР Министрлер Кабинетинин 2021-жылдын 24-декабрындагы № 350 токтомнун редакцияларына ылайык)

18. Департаменттин начальнигинин ыйгарым укуктары:

- Департаменттин бардык аскер кызматчыларынын түздөн-түз начальниги болуп эсептелет;

- кызматтык-күжүрмөн милдеттерди аткаруунун кызыкчылыгында белгиленген сандын чегинде Департаменттин бөлүмдөрүнүн штаттарын бекитет;

- Департаменттин өздүк курамынын күжүрмөн даярдык пландарын жана программаларын бекитет;

- мыйзамдарга ылайык келишим боюнча кызмат өтөп жаткан аскер кызматчыларынын кызмат өтөөсүн камсыз кылат;

- катардагы жоокерден улук прапорщикке чейинки аскердик наамдарды ыйгарат;

- ЖАМКнын төрагасынын, юстиция министринин номенклатурасына кирген кызмат орундары боюнча кызматкерлердин наамдарын кошпогондо, Департаменттин офицерлерине кезектеги аскердик наамдарды белгиленген тартипте ыйгарат;

- юстиция министринин номенклатурасына кирген кызмат орундары боюнча кызматкерлердин наамдарын кошпогондо, белгиленген тартипте ЖАМКнын төрагасына офицердик курамдын алгачкы аскердик наамдарын жана кезектеги аскердик наамдарды ыйгарууга сунуштамаларды киргизет;

- "Кыргыз Республикасынын укук коргоо органдарында кызмат өтөө жөнүндө" Кыргыз Республикасынын Мыйзамында белгиленген тартипте кезектеги аскердик наамдарды мурдагы наамда иштеген жылдарынын белгиленген мөөнөтүнүн жарымынан кем эмеси өткөндөн кийин, башкача айтканда мөөнөтүнөн мурда же мурунку наамынан бир жарым мөөнөт өткөндөн кийин ээлеген штаттык кызмат орду боюнча каралган наамдан бир баскычка жогору ыйгарат;

- Департаменттин өздүк курамын комплекттөө боюнча иштерди жүргүзөт;

- өздүк курам үчүн зарыл болгон социалдык турмуш-тиричилик шарттарынын түзүлүшүн жана материалдык негизинин өнүгүшүн камсыз кылат;

- өзгөчө айырмаланган Департаменттин аскер кызматчыларын өкмөттүк жана мамлекеттик сыйлыктар менен сыйлоого, ардак наамдарды ыйгарууга ЖАМКнын төрагасына белгиленген тартипте сунуштамаларды киргизет;

- Департаменттин аскер кызматчыларын ведомстволук сыйлыктар жана баалуу белектер менен сыйлайт;

- мыйзамдарга ылайык Департаменттин мүлкүн жана каражатын башкарат;

- мыйзамдарга ылайык Департаменттин балансынан негизги каражаттарды эсептен чыгарат;

- Кыргыз Республикасынын Куралдуу Күчтөрүнүн Тартип уставына ылайык Департаменттин аскер кызматчыларына карата кызматтан бошотуудан тышкары, дем берүү жана жаза берүү чараларын колдонуу укугунан пайдаланат;

- Департаменттин борбордук аппаратында жана бөлүмдөрүндө "Айгай" сигналы боюнча чогулууну жарыялайт.

(КР Министрлер Кабинетинин 2021-жылдын 24-декабрындагы № 350 токтомнун редакцияларына ылайык)

19. Согуш маалында Департаментти пайдалануу Кыргыз Республикасынын мыйзамдары менен аныкталат.

7. Департаменттин аскер кызматчыларын социалдык жана укуктук жактан коргоо кепилдиктери

20. Департаменттин аскер кызматчысы кызмат өтөөдө ченемдик укуктук актыларды жетекчиликке алат, бийлик өкүлү болуп эсептелет жана мамлекеттин коргоосунда болот. Өзү баш ийген адамдардан башка эч ким аскер кызматчысынын мыйзамдуу талаптарына кийлигишүүгө укугу жок.

Департаменттин аскер кызматчысы өзүнүн укуктарын жана мыйзамдуу кызыкчылыктарын соттук коргоого алууга, анын ичинде кызматтан бошотуу жөнүндө буйрукка даттанууга укуктуу.

21. Департаменттин аскер кызматчыларынын медициналык жактан камсыз болуу укугу Департаментте санитардык-гигиеналык, профилактикалык жана дарылоо иш-чараларын жүргүзүү, аскер кызматчыларынын ден соолугунун абалын туруктуу контролдоо, жарадар болгон же ооруп калган учурларда аларга медициналык жардам көрсөтүү, аларга дарыларды, медикаменттерди жана медициналык кызмат көрсөтүүлөрдү жазык-түзөтүү системасынын медициналык мекемелеринде акысыз берүү аркылуу ишке ашырылат.

Департаменттин аскер кызматчыларына шашылыш медициналык жардам берүү зарыл болсо, мындай жардам Кыргыз Республикасынын Саламаттык сактоо жана социалдык өнүктүрүү министрлигинин жакынкы медициналык мекемелеринде көрсөтүлөт. Департаменттин аскер кызматчыларына мыйзамдарда аскер кызматчылары үчүн белгиленген социалдык жана укуктук кепилдиктердин башка ченемдери жайылтылат.

8. Материалдык-техникалык жана финансылык камсыздоо

22. Департамент материалдык-техникалык ресурстар, азык-түлүктөр менен Кыргыз Республикасынын Министрлер Кабинети аныктаган ченемдер боюнча камсыз кылынат.

23. Департаментти курал-жарактар, ок-дарылар, инженердик жана химиялык мүлктөр, аскердик жана башка техникалар, аппаратуралар, кайтаруунун техникалык каражаттары жана байланыш каражаттары менен камсыз кылуу колдонуудагы ченемдер боюнча ЖАМК тарабынан ишке ашырылат.

24. Департаментти каржылоо республикалык бюджеттин эсебинен өзүнчө сап менен жүзөгө ашырылат.

25. Департаменттин бөлүмдөрүн жайгаштыруу ЖАМК тарабынан аныкталган өзгөчөлүктөрдү эске алуу менен Коргоо министрлигинин аскердик бөлүктөрү үчүн белгиленген тартип жана ченемдер боюнча жүргүзүлөт.

Түзөтүү мекемелерин кайтаруу боюнча милдеттерди аткарып жаткан бөлүмдөргө Департаменттин бөлүмдөрүн кайтарууга алган мекемелердин, объектилердин эсебинен өздүк курамды жана башкаруу органдарын жайгаштыруу үчүн аскер шаарчалары, имараттар жана курулмалар бөлүп берилет. Департамент коменданттык-диспетчердик, алмашуучу жана өткөрүп берүүчү пункттарды, окуу полигондорун, бута атмаларды, аткыч тирлерди, кызматтык үйрөтүлгөн иттерди кармоо боюнча питомниктерди жана башка окуу объекттерин жабдуу үчүн жер участокторун Департаменттин бөлүмдөрүнө бөлүп берүү маселелери боюнча ЖАМКга сунуштарды киргизет.

26. Департаменттин аскер кызматчылары Кыргыз Республикасынын Куралдуу Күчтөрүнүн аскер кызматчылары үчүн белгиленген үлгүдөгү формалык кийимди кийишет.

27. Департаменттин аскер кызматчылары оорусунун мүнөзүнө, медициналык кызматкерлердин көрсөтмөсүнө жана ыкчам-кызматтык абалына жараша пенитенциардык системанын, Коргоо министрлигинин жана ички иштер органдарынын дарылоо мекемелерине дарыланууга кабыл алынат.

28. Департаменттин аскер кызматчыларын пенсиялык камсыз кылуу Кыргыз Республикасынын аскер кызматчыларын пенсиялык камсыз кылуу жөнүндө мыйзамдарга ылайык жүзөгө ашырылат.

9. Департаменттин аскер кызматчыларын комплекттөө жана даярдоо

29. Департаментке мөөнөттүү аскердик кызмат өтөөгө чакыруу Кыргыз Республикасынын жарандарынын жалпыга бирдей аскердик милдети жөнүндө, аскердик жана альтернативдик кызматтар жөнүндө мыйзамдарына ылайык Кыргыз Республикасынын чакыруу курагындагы жарандарынын эсебинен Коргоо министрлиги тарабынан жүргүзүлөт.

30. Департаменттин аскер кызматчыларын кесиптик даярдоо, кайра даярдоо жана квалификациясын жогорулатуу Департаменттин окутуу бөлүмдөрүндө, коргоо, ички иштер органдарынын окуу жайларында жана чет өлкөлүк окуу жайларда жүзөгө ашырылат.

10. Департаменттин ишин токтотуу

31. Департаменттин ишин токтотуу өзгөртүп уюштуруу же жоюу аркылуу жүргүзүлөт.

32. Департаментти өзгөртүп уюштуруу же жоюу Кыргыз Республикасынын мыйзамдарына ылайык жүзөгө ашырылат.

33. Департаменттин иши юридикалык жактардын мамлекеттик реестрине тийиштүү жазуу киргизилген учурдан баштап токтотулду деп эсептелет.

34. Департаменттин иш процессинде пайда болгон документтер "Кыргыз Республикасынын улуттук архив фонду жөнүндө" Кыргыз Республикасынын Мыйзамына ылайык сакталат.