Кыргыз Республикасынын Өкмөтүнүн «Имараттардын энергетикалык натыйжалуулугу жөнүндө» Кыргыз Республикасынын Мыйзамына өзгөртүүлөрдү киргизүү тууралуу» Кыргыз Республикасынын Мыйзамынын долбоору жөнүндө» токтому

КР Министрлер Кабинетинин 2023-жылдын 13-январындагы № 13 токтомуна ылайык КҮЧҮН ЖОГОТТУ

КЫРГЫЗ РЕСПУБЛИКАСЫНЫН ӨКМӨТҮ ТОКТОМ

2018-жылдын 15-февралы № 93 "Имараттардын энергетикалык натыйжалуулугу жөнүндө" Кыргыз Республикасынын Мыйзамына өзгөртүүлөрдү киргизүү тууралуу" Кыргыз Республикасынын Мыйзамынын долбоору жөнүндө Кыргыз Республикасынын Конституциясынын 79-беренесине ылайык Кыргыз Республикасынын Өкмөтү ТОКТОМ КЫЛАТ:

1. "Имараттардын энергетикалык натыйжалуулугу жөнүндө" Кыргыз Республикасынын Мыйзамына өзгөртүүлөрдү киргизүү тууралуу" Кыргыз Республикасынын Мыйзамынын долбоору жактырылсын.

2. Аталган мыйзамдын долбоору Кыргыз Республикасынын Жогорку Кеңешинин кароосуна киргизилсин.

3. Кыргыз Республикасынын Өкмөтүнө караштуу Архитектура, курулуш жана турак жай-коммуналдык чарба мамлекеттик агенттигинин директору бул мыйзамдын долбоору Кыргыз Республикасынын Жогорку Кеңешинде каралганда Кыргыз Республикасынын Өкмөтүнүн расмий өкүлү болуп дайындалсын.

Кыргыз Республикасынын Премьер-министри

С.Исаков

Долбоор КЫРГЫЗ РЕСПУБЛИКАСЫНЫН МЫЙЗАМЫ

"Имараттардын энергетикалык натыйжалуулугу жөнүндө" Кыргыз Республикасынын Мыйзамына өзгөртүүлөрдү киргизүү тууралуу

1-берене. "Имараттардын энергетикалык натыйжалуулугу жөнүндө" Кыргыз Республикасынын Мыйзамына (Кыргыз Республикасынын Жогорку Кеңешинин Жарчысы, 2011-ж., № 7, 1040-бер.) төмөнкүдөй өзгөртүүлөр киргизилсин:

1) 5-беренеде:

- 10-бөлүк төмөнкүдөй мазмундагы экинчи абзац менен толукталсын:

"Энергетикалык сертификаттын колдонуу мөөнөтү аяктаганда имарат кайрадан энергетикалык сертификациядан өтүүгө тийиш.";

- төмөнкүдөй мазмундагы 15-бөлүк менен толукталсын:

"15. Имараттардын энергетикалык сертификаттарынын маалыматтарын, буу казандарынын, жылытуу жана ысык суу менен жабдуу системаларынын энергетикалык натыйжалуулугун мезгил-мезгили менен контролдоо жөнүндө отчетторду, имараттарды энергетикалык сертификациялоо жана буу казандарынын, жылытуу жана ысык суу менен жабдуу системаларынын энергетикалык натыйжалуулугун мезгил-мезгили менен контролдоо боюнча сертификат алган адистерди системалаштырылган эсепке алуу имараттардын энергетикалык натыйжалуулугу жаатындагы мамлекеттик реестрде ишке ашырылат. Имараттардын энергетикалык натыйжалуулугу жаатындагы мамлекеттик реестрди жүргүзүү тартиби Кыргыз Республикасынын Өкмөтү тарабынан белгиленет.";

2) 6-берененин 4-бөлүгүндө:

- 4-пункт төмөнкүдөй редакцияда баяндалсын:

"4) имараттардын энергетикалык натыйжалуулугу жаатындагы мамлекеттик реестрди жүргүзүү;";

- 6-пункт күчүн жоготту деп таанылсын;

3) 7-берене төмөнкүдөй мазмундагы экинчи абзац менен толукталсын:

"Имараттардын энергетикалык натыйжалуулугу жаатында адистерге классификациялык сертификат берүү тартиби Кыргыз Республикасынын Өкмөтү тарабынан белгиленет.";

4) 8-берене төмөнкүдөй мазмундагы экинчи абзац менен толукталсын:

"Имараттардын энергетикалык натыйжалуулугу жаатында аткарылган иштердин сапатына мониторинг жүргүзүү тартиби Кыргыз Республикасынын Өкмөтү тарабынан белгиленет.". 2-берене. Кыргыз Республикасынын Өкмөтү үч айлык мөөнөттө өз чечимдерин ушул Мыйзамга ылайык келтирсин. 3-берене. Ушул Мыйзам расмий жарыяланган күндөн тартып жети күн өткөндөн кийин күчүнө кирет.

Кыргыз Республикасынын Президенти