Кыргыз Республикасынын «2007-жылдын 23-ноябрында Гаагада кабыл алынган Балдарга алименттерди өндүрүп алуунун эл аралык тартиби жана үй-бүлөнү багуунун башка формалары жөнүндө конвенцияга Кыргыз Республикасынын кошулуусу тууралуу» Мыйзамы

1-берене 2007-жылдын 23-ноябрында Гаагада кабыл алынган Балдарга алименттерди өндүрүп алуунун эл аралык тартиби жана үй-бүлөнү багуунун башка формалары жөнүндө конвенцияга (мындан ары - Конвенция) төмөнкүдөй шарт жана билдирүүлөр менен кошулсун: Шарт: Кыргыз Республикасы Конвенциянын 62 жана 44 (3)-беренелерине ылайык Борбордук органдардын ортосунда башка билдирүүлөрдү жүзөгө ашырууда француз тилин колдонуудан баш тартат. Мындай башка билдирүүлөр орус тилинде же болбосо англис тилинде жүргүзүлөт. Билдирүүлөр: Кыргыз Республикасы Конвенциянын 63-беренесине ылайык төмөнкүдөй билдирүүлөрдү жасайт:

1) Конвенциянын 23 (2) - (11)-беренесинин жоболоруна карабастан, чечимди таануу жана аткаруу жөнүндө билдирүүгө карата Конвенциянын 24 (1)-беренесинде каралган таануу жана аткаруу жол-жобосу колдонулат;

2) Конвенциянын 30 (7)-беренесинде каралган алименттер жөнүндө макулдашууну таануу жана аткаруу жөнүндө билдирүү Кыргыз Республикасынын Борбордук органы аркылуу гана берилиши мүмкүн;

3) Конвенциянын 44 (1)-беренесине ылайык, эгерде сураткан мүчө-мамлекеттердин ар кандай билдирүүлөрү жана тиешелүү документтери тиешелүү түрдө күбөлөндүрүлгөн кыргыз жана (же) орус тилдериндеги котормосу менен коштолсо, алар Кыргыз Республикасынын аймагында аткарууга кабыл алынат.

2-берене Кыргыз Республикасынын Тышкы иштер министрлиги жогоруда көрсөтүлгөн Конвенцияга Кыргыз Республикасынын кошулуусу жөнүндө грамотаны ушул Мыйзамдын 1-беренесине ылайык шарт жана билдирүүлөр менен депозитарий болуп саналган Нидерланддар Королдугунун Тышкы иштер министрлигине депонирлесин.

3-берене Ушул Мыйзам расмий жарыяланган күндөн тартып он күн өткөндөн кийин күчүнө кирет.

Эркин-Тоо газетасынын 2023-жылдын 18-июлундагы № 57 (3506) саны менен жарыяланды

Кыргыз Республикасынын Президенти

С.Н.Жапаров

2023-жылдын 7-июнунда

Кыргыз Республикасынын Жогорку Кеңеши кабыл алган