# 7-берене. Ыйгарым укуктуу мамлекеттик орган менен иш жүргүзүү жана өкүлчүлүк - Документ: [Патент мыйзамы](https://aqlex.ai/kg/doc/112545) - Документтеги орду: 1-глава - Толук аталышы: Кыргыз Республикасынын 2023-жылдын 23-мартындагы № 69 "Патент мыйзамы" Мыйзамы - Актынын түрү: Закон - Номери: 69 - Кабыл алынган күнү: 23.03.2023 - Статусу: Күчүндө - Редакциянын күнү: 23.03.2023 - Тексттин тили: кыргыз тили - aqlex'теги барагы: - Расмий булак: - Башка тилдеги тексти (Markdown): > Текст расмий булактын маалыматы боюнча 23.03.2023 редакциясында берилди. Бул юридикалык кеңеш эмес: юридикалык маанилүү аракеттер үчүн расмий жарыялоо менен салыштырыңыз. > > Кантип шилтеме берүү керек: Патент мыйзамы, 7-берене (23.03.2023 редакциясы) - https://aqlex.ai/kg/doc/112545/st-7 --- 1. Кыргыз Республикасынын жараны болуп саналган, Кыргыз Республикасынын аймагында туруктуу жашаган өтүнмө ээси, патент ээси же башка кызыкдар жак ойлоп табууга, пайдалуу моделге жана өнөр жай үлгүсүнө патент алууга жана башка юридикалык маанилүү иш-аракеттерге байланыштуу иштерди төмөнкүдөй жолдор менен жүргүзө алат: 1) жеке өзү; 2) өкүл аркылуу; 3) патенттик ишенимдүү өкүлдөр жөнүндө Кыргыз Республикасынын мыйзамдарына ылайык ыйгарым укуктуу мамлекеттик органда катталган патенттик ишенимдүү өкүл аркылуу. 2. Чет өлкөлүк жеке же юридикалык жактар же болбосо чет мамлекеттерде катталган алардын патенттик ишенимдүү өкүлдөрү өтүнмө берүүнүн датасын белгилөө, алымдарды төлөө, конвенциялык артыкчылыкты сураган учурда мурдагы өтүнмөнүн көчүрмөсүн берүү, мурдараак берилген өтүнмөнүн көчүрмөсүн берүү, жогоруда көрсөтүлгөн жол-жоболорго карата ыйгарым укуктуу мамлекеттик органдын тил каттарын жана кабарламаларын алуу, патентти күчүндө кармап туруу үчүн алым төлөө менен байланышкан жол-жоболорду кошпогондо, ойлоп табууга, пайдалуу моделге, өнөр жай үлгүсүнө патенттерди алууга, ошондой эле аларды укуктук коргоого байланыштуу иштерди патенттик ишенимдүү өкүлдөр жөнүндө Кыргыз Республикасынын мыйзамдарына ылайык ыйгарым укуктуу мамлекеттик орган тарабынан катталган патенттик ишенимдүү өкүлдөр аркылуу жүргүзөт. 3. Өкүлдүн же патенттик ишенимдүү өкүлдүн ыйгарым укуктары Кыргыз Республикасынын жарандык мыйзамдарына ылайык таризделген ишеним кат менен ырасталат. 4. Чет өлкөлүк жеке же юридикалык жак патенттик ишенимдүү өкүлдөр жөнүндө Кыргыз Республикасынын мыйзамдарына ылайык ыйгарым укуктуу мамлекеттик органда катталган өзүнүн патенттик ишенимдүү өкүлүн дайындаганга чейин ыйгарым укуктуу мамлекеттик органга кат алышуу үчүн Кыргыз Республикасынын аймагында жайгашкан почта дарегин же электрондук почтанын дарегин жазуу жүзүндө билдирүүгө укуктуу. Бул учурда ыйгарым укуктуу мамлекеттик орган ушул почталык же электрондук дарекке жөнөткөн кандай болбосун кабарлама, суроо-талап жана чечим тиешелүү түрдө жеткирилген болуп саналат. --- Мурунку берене: [6-берене](https://aqlex.ai/kg/doc/112545/st-6) Кийинки берене: [8-берене](https://aqlex.ai/kg/doc/112545/st-8)