# 4-берене. Ушул Мыйзамда колдонулуучу негизги түшүнүктөр

- Документ: [Экстремисттик ишке каршы аракеттенүү жөнүндө](https://aqlex.ai/kg/doc/112515)
- Документтеги орду: 1-глава
- Толук аталышы: Кыргыз Республикасынын 2023-жылдын 24-февралындагы № 40 "Экстремисттик ишке каршы аракеттенүү жөнүндө" Мыйзамы
- Актынын түрү: Закон
- Номери: 40
- Кабыл алынган күнү: 24.02.2023
- Статусу: Күчүндө
- Редакциянын күнү: 28.07.2025
- Акыркы өзгөртүү: [Закон Кыргызской Республики от 28 июля 2025 года № 160 "О внесении изменений в некоторые законодательные акты Кыргызской Республики в сфере противодействия экстремистской деятельности"](https://aqlex.ai/kg/doc/230030073)
- Редакцияларды салыштыруу: <https://aqlex.ai/kg/doc/112515#diff=1243725..35852>
- Тексттин тили: кыргыз тили
- aqlex'теги барагы: <https://aqlex.ai/kg/doc/112515/st-4>
- Расмий булак: <https://cbd.minjust.gov.kg/4-3281/edition/1243725/ru>
- Башка тилдеги тексти (Markdown): <https://aqlex.ai/doc/112515/st-4.md>

> Текст расмий булактын маалыматы боюнча 28.07.2025 редакциясында берилди. Бул юридикалык кеңеш эмес: юридикалык маанилүү аракеттер үчүн расмий жарыялоо менен салыштырыңыз.
>
> Кантип шилтеме берүү керек: Экстремисттик ишке каршы аракеттенүү жөнүндө, 4-берене (28.07.2025 редакциясы) - https://aqlex.ai/kg/doc/112515/st-4

---

Ушул Мыйзамда төмөнкү негизги түшүнүктөр пайдаланылат:

1) экстремисттик иш:

а) төмөнкүлөргө багытталган жосундарды пландоо, уюштуруу, даярдоо жана жасоо боюнча иш-аракеттер:

- бийликти күч менен басып алуу;

- бийликти күч менен басып алууга ачык чакырыктар;

- сепаратисттик иш;

- куралдуу козголоң;

- расалык, этностук, улуттук, диний же региондор аралык касташууну (араздашууну) козутуу;

- экстремисттик уюмду түзүү жана (же) анын ишине катышуу;

- экстремисттик уюмду же экстремисттик ишти каржылоо;

- экстремисттик материалдарды даярдоо, таратуу;

- экстремисттик материалдарды сактоо;

- экстремисттик уюмдун атрибуттарын жана символдорун пайдалануу;

б) зомбулук менен коштолгон же Кыргыз Республикасынын кылмыш-жаза мыйзамдарында ушундай деп таанылган зомбулук иш-аракеттерге алып келүүчү экстремисттик жүйөлөр боюнча башка жосундарды жасоо;

2) экстремисттик уюм:

а) экстремисттик ишти жүзөгө ашыруу максаты менен уюшулган топ;

б) экстремисттик ишти жүзөгө ашырууга байланыштуу жоюу жана (же) ишине тыюу салуу жөнүндө Кыргыз Республикасынын сотунун мыйзамдуу күчүнө кирген чечими кабыл алынган юридикалык жак же болбосо башка уюм;

3) экстремисттик материалдар - ар кандай алып жүрүүчүлөрдө жайылтууга арналган, экстремисттик ишти жүзөгө ашыруу зарылдыгына чакырган, негиздеген же актаган, сот тарабынан ушундай деп таанылган маалыматтык материалдар;

4) экстремисттик уюмдун атрибуту жана символу - экстремисттик ишти жүзөгө ашырууга байланыштуу сот аны жоюу же анын ишине тыюу салуу жөнүндө чечим чыгарган уюмдун атрибуту жана символу. Экстремисттик уюмдун атрибутун жана символун илимий-изилдөө максатында гана пайдаланууга жол берилет;

5) экстремисттик иштин алдын алуу (профилактикалоо) - экстремисттик иштин пайда болушуна жана жайылышына өбөлгө болуучу себептерди жана шарттарды аныктоо, изилдөө, жоюу боюнча мамлекеттик ыйгарым укуктуу органдар жана жергиликтүү өз алдынча башкаруу органдары тарабынан жүргүзүлүүчү укуктук, экономикалык, социалдык, уюштуруучулук, билим берүүчүлүк, тарбиялык, агартуучулук жана башка чаралардын комплекси;

6) экстремисттик ишке каршы аракеттенүү - мамлекеттик органдардын улуттук коопсуздукту камсыз кылууга, адамдын жана жарандын укуктарын жана эркиндиктерин, конституциялык түзүлүштүн негиздерин экстремисттик иштен коргоого, экстремисттик иштин алдын алууга, аныктоого жана бөгөт коюуга жана анын кесепеттерин жоюуга багытталган иши;

7) эскертме - экстремисттик багыттагы кылмыштардын белгилери жок болгондо экстремисттик ишке каршы аракеттенүү боюнча ыйгарым укуктуу мамлекеттик органдын юридикалык жактарга жана башка уюмдарга карата чыгарылуучу, экстремисттик материалдарды жайылтуунун жана экстремисттик ишти жүргүзүүнүн жол берилбестигин көрсөтүүчү расмий документ. Эскертменин формасы жана аны чыгаруунун тартиби Кыргыз Республикасынын Министрлер Кабинети тарабынан белгиленет.

(КР 2025-жылдын 28-июлундагы № 160 Мыйзамынын редакциясына ылайык)

---

Мурунку берене: [3-берене](https://aqlex.ai/kg/doc/112515/st-3)  
Кийинки берене: [5-берене](https://aqlex.ai/kg/doc/112515/st-5)