3-берене. Негизги түшүнүктөр

Ушул Мыйзамда төмөнкү түшүнүктөр колдонулат:

1) өрт коопсуздугу чөйрөсүндөгү ыйгарым укуктуу мамлекеттик орган - коргоо, алдын алуу жана өрт өчүрүү объекттеринин өрт коопсуздугунун талаптарын аткарууну контролдоо жана көзөмөлдөө боюнча, ошондой эле авариялык-куткаруу жана башка кечиктирилгис иштерди жүргүзүү боюнча Кыргыз Республикасынын аткаруу бийлигинин мамлекеттик органы;

2) өрт - материалдык зыян алып келүүчү, жарандардын өмүрүнө жана ден соолугуна, коомдун жана мамлекеттин кызыкчылыктарына зыян келтирүүчү контролдонбогон күйүү;

3) өрт коопсуздугу - инсандын, мүлктүн, коомдун жана мамлекеттин өрттөн коргонуу абалы;

4) коргоо объекти - буга карата өрт коопсуздугунун талаптары белгиленген же белгиленүүгө тийиш болгон жеке же юридикалык жактардын мүлкү, мамлекеттик же муниципалдык мүлк (аймактар, имараттар, курулмалар, транспорт каражаттары, технологиялык орнотмолор, жабдуулар, агрегаттар, буюмдар жана башка мүлктөр);

5) өрттүн алдын алуу - өрт чыгуу мүмкүнчүлүктөрүн жоюуга жана алардын кесепеттерин чектөөгө багытталган алдын алуучу чаралардын жыйындысы;

6) өрткө каршы режим - тийиштүү аймактарда өрт коркунучу жогорулаган учурда мамлекеттик бийлик органдары же жергиликтүү өз алдынча башкаруу органдары тарабынан белгиленген өрт коопсуздугунун кошумча талаптары;

7) өрт коопсуздугунун системасы - укуктук, уюштуруучулук, экономикалык, социалдык, илимий-техникалык чаралардын, тарбиялык мүнөздөгү чаралардын, ошондой эле өрттүн алдын алууга жана аны жоюуга багытталган күчтөрдүн жана каражаттардын жыйындысы;

8) өрт өчүрүү жана авариялык-куткаруу иштерин жүргүзүү - адамдарды, мүлктү куткарууга жана өрттү жоюуга багытталган бир убакта аткарылуучу иш-аракеттердин комплекси;

9) долбоордук документтерге өрт-техникалык экспертиза жүргүзүү - өрт коопсуздугу чөйрөсүндөгү ченемдик укуктук актылардын талаптарын бузууларды (четтөөлөрдү) болтурбоо максатында имараттарды, курулмаларды, комплекстерди жана башка объекттерди долбоорлоодо долбоордук чечимдердин өрт коопсуздугунун талаптарына ылайык келишин баалоо;

10) өрт коопсуздугуна көз карандысыз баа берүү - коргоо объектинин өрт коопсуздугунун талаптарына шайкеш келүүсүнө, уюмдардын жана жарандардын өрт коопсуздугунун эрежелерин сактоосуна, өрттүн келип чыгуу себептерин аныктоодо баалоонун же текшерүүнүн натыйжаларына кызыкдар болбогон өрт коопсуздугу жаатындагы эксперт тарабынан жүргүзүлгөн баалоо;

11) өрт коопсуздугу жаатындагы эксперт - өрт коопсуздугун баалоо боюнча иштерди жүргүзүүчү, белгиленген тартипте аккредитацияланган (аттестацияланган), өрт коопсуздугуна көз карандысыз баа берүү үчүн зарыл болгон өрт коопсуздугу жаатында атайын билимге ээ жана өрт коопсуздугун көз карандысыз баалоо боюнча корутундуга кол коюуга ыйгарым укуктуу адам.

(КР 2024-жылдын 16-январындагы № 16 Мыйзамынын редакциясына ылайык)