«Кыргыз Республикасындагы гидрометеорология иши жөнүндө» Кыргыз Республикасынын Мыйзамына өзгөртүү киргизүү тууралуу» Мыйзамы

1-берене. "Кыргыз Республикасындагы гидрометеорология иши жөнүндө" Кыргыз Республикасынын Мыйзамына ("Эркин Тоо" газетасы, 2006-жылдын 22-августу, № 62) төмөнкүдөй өзгөртүү киргизилсин:

15-берене төмөнкүдөй редакцияда баяндалсын: "15-берене. Гидрометеорология иши чөйрөсүндөгү бузуулар үчүн жоопкерчилик Юридикалык жана жеке жактар Кыргыз Республикасынын бузуулар жөнүндө мыйзамдарына ылайык төмөнкүдөй учурларда жоопкерчилик тартат:

а) гидрометеорологиялык станцияларды, постторду, приборлорду же ушул объекттердеги жабдууларды бүлүндүрсө, бузса, уурдаса жана иштен чыгарса;

б) бардык түрдөгү гидрометеорологиялык станциялардын же посттордун коргоо аймактарындагы иштерди аткаруу тартибин бузса;

в) жаратылыш чөйрөсүнүн абалына байкоо жүргүзүүнү жүзөгө ашыруучу гидрометеорологиялык станциялардын же посттордун сакталышын бузса;

г) болжолдорду берүүнүн тартибин бузса же бурмаласа, же болбосо маалымат булагын көрсөтпөсө, же финансылык пайда табуу максатында маалыматтык гидрометеорологиялык продукцияны жалпыга маалымдоо каражаттары аркылуу үчүнчү жактарга берсе.".

2-берене. Ушул Мыйзам расмий жарыяланган күндөн тартып он беш күн өткөндөн кийин күчүнө кирет. "Эркин Тоо" мамлекеттик расмий газетасынын 2021-жылдын 26-мартындагы № 26 (3205) жарыяланды

Президент Кыргызской Республики

С.Жапаров

2021-жылдын 17-февралында

17 февраля 2021 года