44-статья. Камакта кармоочу жайлардагы өзгөчө шарттардын режими

Табигый кырсыктар, эпидемиялар, эпизоотийлер болгондо, чоң аймактарды өрт каптаганда, жашоо тиричилигин камсыз кылуу тармагында чоң кырсыктар, массалык баш аламандыктар болгон учурда же камакта кармоочу жайларда куралдуу кол салуу коркунучу чындап түзүлгөндө шектүү жана айыпкерлердин массалык баш ийбөөсү болгондо ички иштер органдарынын, жазык-аткаруу тутумунун, улуттук коопсуздук, коргонуу органдарынын жетекчилеринин буйругу боюнча Кыргыз Республикасынын Башкы прокурору менен макулдашуу аркылуу алардын компетенциясынын чегинде камакта кармоочу жайларда жыйырма суткадан ашпаган мөөнөткө өзгөчө шарттар режими киргизилет. Өзгөчө шарттардын режими киргизилгенде шектүүлөрдүн жана айыпкерлердин катышуусу менен өткөрүлүүчү бардык иш-чараларга чектөө коюлушу жана токтотулушу ыктымал; аларды кайтаруу, өткөрмө режим жана камакта жаткан шектүүлөр менен айыпкерлерге көзөмөл күчөйт, жөнөтмөлөр же кийирүүлөр токтотулат жана ошондой эле мекеменин кадимкидей иштешин турукташтыруунун башка да чаралары көрүлөт. Шектүүлөрдүн, айыпкерлердин жана башка адамдардын өмүрүнө жана ден соолугуна түздөн-түз коркунуч туулган кезде камакта кармоочу жайдын башчысы, ал жок кезде - анын орун басары ведомстволук баш ийүүсү боюнча органдын жетекчисин ошол замат кабардар кылуу менен, ушул статьянын экинчи бөлүгүндө каралган чараларды өз алдынча колдоно алат. Камакта кармоочу жайлардагы өзгөчө шарттардын режими аны киргизген орган же кызмат адамы, болбосо жогорку орган, же кызмат адамы тарабынан токтотулат. (КР 2011-жылдын 14-июлундагы № 99, 2013-жылдын 25-ноябрындагы № 206, 2021-жылдын 23-апрелиндеги № 56 Мыйзамдарынын редакцияларына ылайык) IV Глава Корутунду жоболор